samgöngur á sunnanverðum Vestfjörðum.
Virðulegi forseti. Það er alveg rétt að þungaflutningar fara verr með vegina en flest annað, bæði vöruflutningar og eins fólksflutningar. Það er nákvæmlega það sem við höfum verið að sjá á liðnum árum í vaxandi mæli og sérstaklega eftir þennan erfiða vetur; ófyrirséðar skemmdir á vegunum sem menn bjuggust ekki við í mati Vegagerðarinnar, bæði í fyrra og eins í vetur. Það vakti furðu mína í umræðum hér í gær að hv. þingmenn, þeirra á meðal samflokksmenn fyrirspyrjanda, voru að hnýta í það að ríkisstjórnin ætlaði að bregðast við þeim ófyrirséða vanda og setja aukna fjármuni í að bæta vegina. Það er tilgangur okkar sem erum í stjórnsýslunni að bregðast við. Þessa ábendingu hv. þingmanns, um að hugsanlega þurfi að gera það með öðrum hætti á sunnanverðum Vestfjörðum vegna aukinna flutninga, er sjálfsagt að skoða á sama hátt og það er sjálfsagt að skoða hvernig við getum brugðist við hinum ófyrirséða vanda sem hefur komið upp á liðnum vetri með því að setja aukið fjármagn í viðhald á vegum hringinn í kringum landið. Hún kom mér mjög á óvart umræðan sem meðal annars kom frá hv. samflokksmönnum fyrirspyrjanda í gærkvöldi.