14.12.1978
Efri deild: 27. fundur, 100. löggjafarþing.
Sjá dálk 1545 í B-deild Alþingistíðinda. (1027)
7. mál, ráðstafanir vegna breytingar á gengi íslenskrar krónu
Oddur Ólafsson:
Herra forseti. Það hefur verið rætt um hraðfrystihúsin á Suðurnesjum hér í hv. Alþ. áður og komið fram það sem er rætt hér núna, komið fram reyndar oft áður, að þau væru ekki jafnvel í stakk búin og önnur frystihús í landinu til þess að sinna hlutverki sínu. Ég vildi segja fyrst og fremst það, að þetta á sér eðlilegar orsakir. Fyrir allmörgum árum var sett af stað svonefnd hraðfrystihúsaáætlun. Þessi hraðfrystihúsaáætlun var síðan framkvæmd um allt land, en þegar komið var að Reykjavíkursvæðinu, a.m.k. Reykjaneskjördæmi, stöðvaðist framkvæmd áætlunarinnar. Það er í raun og veru þetta sem veldur því, hve illa frystihúsin á Suðurnesjum eru útbúin, að fjármagn frá Fiskveiðasjóði og frá öðrum sjóðum, sem til þessa hafa lagt fjármagn, fór til þess að sinna þessum verkefnum úti á landi. Þegar átti svo að taka Reykjanessvæðið fyrir allmörgum árum var fjármagnið þrotið. Einnig gerðist það, að skuttogarakaup vorn hafin í stórum stíl og Fiskveiðasjóður orðinn fjárvana. Þegar tekið var svo til og átti að fara að skipuleggja aðgerðir þarna, þá skeði tvennt: bæði var fjármagnið á þrotum, eins og ég sagði, og þar að auki var prósentan lækkuð þannig að þeir, sem áttu að fá þetta fjármagn, fengu minna hlutfall af því, sem framkvæmdirnar kostuðu, en áður hafði verið.
Allt þetta veldur svo því, að þarna er um sérstakar aðstæður að ræða. Þetta er búið að þvælast á milli opinberra aðila nú í fjöldamörg ár með mjög litlum árangri, og þótt oft hafi verið á þetta minnst hér á Alþ. hefur það oftast endað með því, að skipuð hefur verið ný nefnd eða nýir aðilar frá Framkvæmdastofnun ríkisins eða Byggðasjóði tekið á verkefninu með mjög vafasömum eða litlum árangri. Mér þykir því vænt um að heyra það, að n. hefur viljað kynna sér þetta mál gaumgæfilega. Ég held að hún gæti fengið mjög viðamiklar upplýsingar um þetta mál hjá Framkvæmdastofnun ríkisins, hjá hagdeild Seðlabankans, hjá hagdeild Útvegsbankans og hagdeild Landsbankans. Allir þessir aðilar munu hafa rannsakað þetta mál mjög vel, jafnvel þó sú áfangaskýrsla, sem nú er í gangi, hafi ekki komið fram.
En ég vil leggja áherslu á það, að fjármagnsskorturinn á undanförnum árum á að mínu viti mestan þátt í því, hvernig ástatt er þar syðra núna. Þar að auki bætist það við, að talsvert mikil breyting hefur orðið á samsetningu afla, sem hefur valdið frystihúsunum alveg sérstökum erfiðleikum og ýmislegt fleira hefur komið til. Þetta er því flókið mál og vandasamt og má ekki afgreiða með því að segja að þeir þarna suður frá séu ekki færir um að reka frystihúsin.