24.03.1980
Neðri deild: 48. fundur, 102. löggjafarþing.
Sjá dálk 1347 í B-deild Alþingistíðinda. (1326)
45. mál, tekjustofnar sveitarfélaga
Halldór Blöndal:
Herra forseti. Ég heyrði að hv. 7. þm. Reykv. hefur haft vondan kennara í skattamálum. Staðreyndin er að sjálfsögðu sú, að eftir því sem skattar eru lægri vegur skattbyrðin minna og þá borga einstaklingarnir minna. Þetta er augljóst mál. Það var misskilningur hjá hæstv. fjmrh. eða vísvitandi ósannindi þegar hann sagði í útvarpi síðast þegar þetta mál var til umr. að skattahækkanir hefðu skattalækkun í för með sér, enda kom þá í ljós að hann skilur hvorki upp né niður í því hvað persónufrádráttur er. Það er enn fremur rangt að persónufrádráttur sé helmingi hærri samkv. þessum lögum en vera mundi ef eldri skattalög hefðu gilt. Hann er ívið hærri hjá einstaklingum, 50% hærri hjá hjónum. Skattstigar eru knappari og þyngri. 30% þrepið hefur verið niður fært og gert að 35% þrepi, sem bitnar á þeim mönnum sem þar voru áður. 50% skattþrep er komið eins og sjálfsagt mál og bitnar á launafólki, mest kannske fólki í frystihúsum. Af þessum ástæðum segi ég já.
