19.02.1981
Sameinað þing: 51. fundur, 103. löggjafarþing.
Sjá dálk 2460 í B-deild Alþingistíðinda. (2619)
Umræður utan dagskrár
Þorv. Garðar Kristjánsson:
Herra forseti. Ég vil lýsa ánægju minni yfir því að hæstv. félmrh. virðist telja að Bjargráðasjóður sé eðlilegasta leiðin til að koma við bótum út af því tjóni sem það ofviðri hefur valdið sem hér um ræðir. Að vísu sagði hæstv. ráðh. að honum virtist að þetta tjón, sem nú hefði orðið, væri svo margbreytilegt að það mundi ekki allt falla undir Bjargráðasjóð. (Félmrh.: Ég sagði að það væri ekki víst.) Ekki víst, já. Ég skal ekki fullyrða neitt um þetta, en bendi á að 8. gr. laga um Bjargráðasjóð, sem kveður á um þetta efni, er ákaflega víðtæk. Mér þykir því ólíklegt að það sé margt sem ekki falli þarna undir.
Hæstv. ráðh. sagði svo að hann treysti sér ekki til að nefna ákveðna tölu um það, hvað bæturnar þyrftu að vera miklar, en í tillögu okkar sjálfstæðismanna er talað um 30 millj. nýkr. Ég tók fram í máli mínu að þetta væri áætlunartala. Auk þess er tekið svo til orða í till., að það sé allt að 30 millj. Frá okkar sjónarmiði getur þetta því komið til endurskoðunar, en við töldum að það væri ekki fráleitt að nefna þessa tölu. Eins og hæstv. ráðh. líka benti á fer ekki saman heildartjónið og heildarbæturnar eftir þessari leið, því að bætur geta komið eftir fleiri leiðum, t.d. úr tryggingakerfinu.
Þá vil ég segja það, að ég held að við verðum að gera ráð fyrir að þegar frv. til lánsfjárlaga fyrir árið 1981 verður afgreitt liggi fyrir í höfuðdráttum hvað tjónið er mikið umfangs, þannig að ég held að þetta með upphæðina verði okkur ekki að neinu vandamáli. Það hlýtur að koma í ljós. Aðalatriðið er það, að við getum sameinast um að gera markvissar ráðstafanir sem koma sem fyrst að notum. Mér virðist að menn geti verið sammála um að það verði eftir þeim leiðum sem við sjálfstæðismenn leggjum til, þ.e. að efla Bjargráðasjóð í þessu skyni.
Forseti tók öll dagskrármálin af dagskrá.