18.02.1982
Efri deild: 45. fundur, 104. löggjafarþing.
Sjá dálk 2502 í B-deild Alþingistíðinda. (2153)
208. mál, sveitarstjórnarlög
Salome Þorkelsdóttir:
Herra forseti. Eins og hér hefur komið fram er 1. gr. þessa frv., sem hér er nú flutt, samhljóða því frv. til l. sem ég ásamt þeim hv. þm. Stefáni Jónssyni, Stefáni Guðmundssyni og Eiði Guðnasyni flutti hér og mælt var fyrir 10. febr. s.l. Ég hlýt því að lýsa stuðningi mínum við þessa grein frv. Hún er bókstaflega samhljóða. Það er aðeins eitt orð sem er ekki alveg það sama og skiptir ekki máli því það er sama meiningin. Hér er talað um: „sem ekki ber upp á aðfangadag hvítasunnudags,“ en í hinu frv. er talað um: „sem ekki ber upp á hvítasunnuhelgi“. Að öðru leyti eru þessar greinar samhljóða.
Varðandi það, hvort ætti að breyta kosningunum og hafa þær um allt land í maímánuði, eins og kom fram hjá hv. 5. þm. Vesturl., get ég upplýst að upphaflega hafði ég samið frv. í þá veru, en að athuguðu máli, þar sem mér var kunnugt um að í ýmsum dreifbýlishreppum mundi slíkt ekki vera vel séð og gæti hugsanlega orði til að tefja málið, fannst mér réttara að láta það bíða, eins og kom reyndar fram hjá hv. 5. þm. Vesturl. því að þetta þyrfti að athuga, en það gæti tafið málið. Mér finnst það e.t.v. ekki vera aðalatriðið núna, en sjálfsagt að kanna það og leita eftir umsögnum, ef það hefur ekki verið gert áður en þetta stjfrv. var lagt fram.
Við 2. gr. frv. vil ég lýsa stuðningi mínum. Mér sýnast þau atriði. sem þar koma fram. vera öll til bóta. Allar þær breytingar á kosningalögum, hvort sem um er að ræða kosningar til sveitarstjórna eða Alþingis, sem lúta að því að auðvelda mönnum að nota kosningarrétt sinn, eru til bóta og reyndar sjálfsagðar. Þetta á ekki síst við um það fólk sem er að flytja á milli byggðarlaga rétt fyrir kosningar og hefur af þeim sökum orðið fyrir því að detta hreinlega út af kjörskrá og geta hvergi kosið. Einmitt þetta atriði, að sá tími er styttur niður í tvær vikur að maður geti komist á kjörskrá á þennan hátt í því sveitarfélagi sem hann er fluttur til, það tel ég vera til mikilla bóta.
Hvort þetta mál á að fara í allshn. eða félmn. skiptir e.t.v. ekki miklu máli. Eins og kom fram hjá hæstv. ráðh. var það metið á þann veg um daginn, að hér væri um kosningamál að ræða, sem þá heyrir væntanlega undir dómsmrn. þó að sveitarstjórnarlögin geri það ekki sem slík, og þar sem nýlega hafði verið afgreitt frv. varðandi breytingar á lögum um kosningar til Alþingis þótti rétt að vísa síðara frv. til allshn. En ég skal ekki setja mig í dómarasæti varðandi það. Sjálfsagt verður það metið af réttum aðilum. En þetta sýnir kannske best að það er hálfgerður ruglingur á þessum kosningalögum yfirleitt. Við höfum lög um sveitarstjórnarkosningar, við höfum sveitarstjórnarlög og enn fremur lög um kosningar til Alþingis. Þetta er í þremur liðum. Það er e.t.v. von að menn geti eitthvað ruglast í ríminu. Ég hef stundum verið að hugleiða hvort það væri ekki eðlilegra að kosningalög almennt heyrðu undir einn lagabálk. Það er kannske annað mál. En ég vil lýsa stuðningi mínum við þetta frv. og sérstaklega það, að málinu verði flýtt og ekki verði farið að fara út í breytingar á þessu frv. sem gætu orðið til að seinka því.