05.11.1981
Sameinað þing: 14. fundur, 104. löggjafarþing.
Sjá dálk 539 í B-deild Alþingistíðinda. (378)
67. mál, íþróttamannvirki á Laugarvatni
Alexander Stefánsson:
Herra forseti. Ég er hvorki íþróttafrömuður né annað því um líkt, en ég er þó alla vega gamall Laugvetningur.
Þessi þáltill., sem hér liggur fyrir til umr., er að mínu mati um margt furðuleg, svo að ekki sé meira sagt. Í fyrsta lagi mætti álykta svo, að hv. flm. vissi fullvel að til að hefja framkvæmdir við byggingu íþróttamannvirkja á Laugarvatni þarf fjármagn. Ef hann treystir ekki fjvn. til að leggja fram raunhæfa formlega tillögu um fjárveitingu til framkvæmda sem koma að gagni á Laugarvatni umfram það sem hæstv. fjmrh. hefur lagt til í fjárlagafrv., þá tel ég að hann hefði átt að leggja fram í byrjun þingveru sinnar brtt. við fjárlagafrv. hæstv. fjmrh. um fjárveitingu til þeirra framkvæmda. Annað er að mínu mati yfirklór og sýndarmennska. En e. t. v. má álykta að hv. þm. sé að hlífa hæstv. fjmrh. Það skyldi þó aldrei vera.
Í öðru lagi tel ég að þessi tillöguflutningur hv. þm. sé skortur á háttvísi og raunar vanhugsað framtak miðað við að vinna málefninu gagn. Var t. d. ekki eðlilegt að bjóða þm. Suðurl. að vera með í aðgerðum til að ná árangri í uppbyggingu staðarins? Hefur hann leitað eftir slíku? Það hefur komið fram hér að svo er ekki. Hefur hann þá leitað t. d. formlega eftir stuðningi við málið í fjvn. og hjá formanni fjvn. og meðal ýmissa þm. úr öðrum flokkum sem áhuga hafa á velferð og uppbyggingu Laugarvatns sem mennta- og menningarseturs? Ég fullyrði að allt annað en slíkur tillöguflutningur hefði verið árangursríkara fyrir framgang þessa máls.
Ég tel að það sé alveg augljóst mál að hér á hv. Alþingi er vilji fyrir uppbyggingu Laugarvatnsskólans og sérstaklega uppbyggingu íþróttamannvirkja á staðnum. Það hefur komið hér fram, að í mínum þingflokki er þetta mál baráttumál og hefur verið það árum saman. Það má líka minna á og fullyrða að uppbygging Laugarvatns sem menntaseturs er nátengd Framsfl. frá fyrstu tíð. Um það þarf ekki að ræða.
Ég vil segja að okkur, sem höfum stundað nám á Laugarvatni, gömlum Laugvetningum, er fullljóst að bygging íþróttamannvirkja á staðnum er brýnasta nauðsyn og hefur dregist allt of lengi til tjóns fyrir menningarlíf og íþróttalíf og raunar alla íþróttastarfsemi í landinu. Ég nefni sem dæmi að íþróttahús og íþróttaaðstaða hafa sem betur fer risið upp víða um landið og íþróttastarfsemi aukist með ári hverju, þó að vissulega sé hægt að tala um að margt sé enn ógert. En skortur á sérmenntuðum íþróttakennurum er alvarlegt vandamál víðs vegar um landið. Íþróttakennara er ekki hægt að fá. Hvers vegna? Svarið er augljóst. Aðstaðan til menntunar íþróttakennara í Íþróttakennaraskóla Íslands á Laugarvatni er svo hörmuleg sem raun ber vitni. Það er aðalástæðan, fyrir svo utan aðstöðuleysið sem aðrar menntastofnanir staðarins búa við, sem er einnig hörmuleg staðreynd.
Við fjárlagagerð 1980 og 1981 var tekist á um þetta mál og stefnan mörkuð á Alþingi með samþykkt fjárlaga. Við samþykkt fjárl. 1981 flutti öll fjvn. brtt. við fjárlagafrv. fjmrh. á þskj. 326, þar sem nefndin lagði til að liðurinn Gjaldfærður stofnkostnaður hækkaði úr 35 millj. kr. í 100 millj. Auk þess var samþykkt brtt. frá fjvn. um hækkun til viðhalds. Þessar till. samþykkti Alþingi einróma og þar með að framkvæmdir við byggingu íþróttamannvirkja á Laugarvatni yrðu hafnar á þessu ári. Ég vil undirstrika að fjvn. hefur á þessu ári ekki haft frekari afskipti af málinu til þessa. Mér og öðrum þm. kom að sjálfsögðu algerlega á óvart að fjmrh. gerir ekki ráð fyrir verulegum fjárveitingum til framkvæmda á árinu 1982. Ég efast ekki um að samstaða verður um það í fjvn. að leiðrétta þessi mistök, sem ég vil nefna þetta, í fjárlagafrv. Það munum við gera við afgreiðslu fjárl. Fyrir því tel ég vera mikinn meiri hl. Ég efast ekki um að hv. þm. muni sameinast um að leiðrétta þetta mál þannig að það fái eðlilegan framgang. Þessi vanhugsaða þáltill., sem hér liggur fyrir, breytir þar engu um. Ég er ekki þar með að segja að hv. þm. Baldur Óskarsson hafi nokkuð að segja sem geti orðið til tjóns í þessu máli, vegna þess að ég met hann ekki þannig að hann geti haft þau áhrif. Það hefði þó að mínu mati verið skynsamlegra fyrir hv. þm. að ráðgast t. d. við hv. formann fjvn., ég tala nú ekki um fjmrh., áður en hann hófst handa. Hefur hann e. t. v. ekki haft aðgang að þessum mönnum? Maður verður að spyrja sjálfan sig að því.
Herra forseti. Það væri hægt að tala hér lengi um málefni Laugvetninga en ég ætla ekki að gera það að þessu sinni. En ég vil sérstaklega fagna samstilltum áhuga og framkvæmdavilja allra aðila sem standa að Laugarvatnsskólunum. Það hefur greinilega komið fram hér á Alþingi í dag og í fjölmiðlum í fréttum af fundum á Laugarvatni. Þessu vil ég fagna. Ég skal ekkert segja um hver árangur þessarar ferðar Laugvetninga verður. En eitt er víst, að við hljótum að sameinast um að byggja upp myndarlegt íþróttamannvirki á Laugarvatni og tryggja stöðu þessa menntaseturs í framtíðinni. Það hljótum við allir að vera sammála um. Ég sem gamall Laugvetningur segi að það er mitt metnaðarmál.