21.02.1984
Sameinað þing: 54. fundur, 106. löggjafarþing.
Sjá dálk 3017 í B-deild Alþingistíðinda. (2613)
106. mál, landnýtingaráætlun
Stefán Benediktsson:
Herra forseti. Ég kem upp aðeins til að lýsa stuðningi mínum við þáltill. sem hér er til umr. Byggðastefna hefur verið þó nokkuð mikið á dagskrá á þessu þingi og að nokkru leyti fyrir frumkvæði BJ. Má þar minna á þáltill. sem við fluttum snemma, í upphafi þings, um skipan byggðaáætlana. Þar kom fram, sem ég vildi aðeins minna á hér, að ég tel landnýtingaráætlun fram setta af hálfu ríkisvalds algjöra grundvallarforsendu fyrir því að menn geti útfært byggðastefnu með skynsamlegu móti. Slík áætlun, þegar hún kemur fram, er alltaf meira og minna metin pólitískt, það fer ekkert milli mála, eins og frsm. gat um, en þá eru menn líka að taka á málum þannig að þeir vita nokkurn veginn um hvað þeir eru að ræða. Það fer þá heldur ekkert milli mála á hvaða þætti menn kjósa að leggja áherslu og fer af byggðastefnuumræðunni sá bragur, sem oft hefur verið á á undanförnum árum, að menn slíta hluti nánast úr öllu samhengi við heildina og taka bæði ákvarðanir eða þátt í umr. án þess að horfa á nema mjög einangruð fyrirbæri í einu. Þess vegna tel ég þetta eitt með gagnlegri málum sem fram hafa komið á þessu þingi og styð það heils hugar.