22.02.1984
Neðri deild: 50. fundur, 106. löggjafarþing.
Sjá dálk 3092 í B-deild Alþingistíðinda. (2690)
159. mál, tekjuskattur og eignarskattur
Svavar Gestsson:
Herra forseti. Þess var farið á leit, ef það mætti greiða fyrir þingstörfum að öðru leyti, að umr. þær um kjaramál sem hafnar voru hér í dag og ég hygg að hv. 1. þm. Suðurl. hafi hafið fari fram á morgun, en dagskrármálið sem hér var á dagskrá fyrir kvöldmatinn verði rætt áfram. Við Alþb.-menn, sem höfum tekið þátt í þessum umr., erum fyrir okkar leyti tilbúnir til að standa að slíku samkomulagi, enda fari fram umr. um kjaramálin utan dagskrár á morgun á fundi í Sþ.
Ég kvaddi mér núna hljóðs til að staðfesta það samkomulag um vinnubrögð sem við fyrir okkar leyti værum tilbúnir til að standa að. En í öðru lagi stóð ég hér upp til að minna á að í kvöldfréttum Ríkisútvarpsins var enn þá einu sinni greint frá því að hæstv. forsrh. landsins hefði haft í hótunum við verkalýðshreyfinguna um það, að ef ekki hvert einasta verkalýðsfélag samþykkti svokallaðan kjarasamning, sem var undirritaður í gær af forseta Alþýðusambandsins og framkvæmdastjóra Vinnuveitendasambandsins, þá féllu niður svokallaðar félagslegar ráðstafanir. Þessi hótun forsrh., endurtekin núna í kvöld, er algerlega einstæð og öll hin ósvífnasta. Maklegast væri auðvitað að kalla hæstv. ráðh. hingað þegar í stað til að standa fyrir máli sínu, eftir þetta blaður sem frá honum hefur komið, svo að ljóst verði hvað hann á við.
Nú stendur þannig á að eitt stærsta verkalýðsfélag landsins, Verslunarmannafélag Reykjavíkur, hefur hafið félagsfund til að fjalla um þessa svokölluðu kjarasamninga. Það er auðvitað hrikalegt að ætla nokkru verkalýðsfélagi að fjalla um kjarasamninga undir slíkum ummælum forsrh. landsins. Því verður hins vegar ekki breytt úr þessu og vonandi fæst úr því skorið á morgun hvað ríkisstj. ætlar að ganga langt í þessu efni og hvað hæstv. forsrh. á við með þeim hraklegu hótunum sem hann hefur haft í frammi utan þessara sala.
Ég vænti þess því að umr. á morgun verði til þess að greiða fyrir því að ljóst verði hvernig ríkisstj. hyggst standa að þessum málum, en síðustu hótanir hæstv. forsrh. komu fram í kvöldfréttum rétt áðan.