14.03.1984
Neðri deild: 57. fundur, 106. löggjafarþing.
Sjá dálk 3728 í B-deild Alþingistíðinda. (3150)
210. mál, vísitala framfærslukostnaðar
Viðskrh. (Matthías Á. Mathiesen):
Herra forseti. Á þskj. 373 er flutt frv. til l. um vísitölu framfærslukostnaðar og skipan til Kauplagsnefndar. Þetta frv. hefur verið til meðferðar í hv. Ed. og afgreitt þar með nál. á þskj. 430 og 433 frá meirihluta og minnihluta. Við lokaafgreiðslu máls greiddu þm. þeirrar hv. deildar, eins og fram kemur í nál., frv. atkvæði sitt. Minnihluti fjh.-og viðskn. lagði til brtt. en eftir afgreiðslu á þeim, sem ekki voru samþykktar þar, greiddu þm. deildarinnar atkvæði með frv.
Við 1. umr. þessa máls í hv. deild gerði ég nokkra grein fyrir sögu vísitölu framfærslukostnaðar sem fyrst var reiknuð skv. lögum frá því 1939. Grundvöllur þeirrar vísitölu, sem reiknaður hefur verið á undanförnum áratugum, er frá því 1964–1965, en þá var gerð sérstök neyslukönnun og sá grundvöllur, sem fékkst með þeirri neyslukönnun, lögfestur með lögum nr. 70/1967.
Sú ein breyting hefur verið gerð að 1. jan. 1981 var vísitalan á ný sett í 100 skv. lögum nr. 87/1980. Hins vegar hefur síðan verið gerð ný neyslukönnun á árinu 1978–1979. Sú neyslukönnun leiðir í ljós breytingar og er m. a. gerð grein fyrir því í grg. með frv. á bls. 6 í þskj. hvernig breytingin hefur orðið frá 1965–1979.
Með því frv. sem hér er flutt er lagt til að sá vísitölugrunnur sem byggður er á neyslukönnuninni frá 1978–1979 verði upp tekinn nú miðað við 1. febr. enda þótt að ljóst sé að frá þeim tíma hafi orðið einhverjar breytingar á neysluvenjum og neyslu þeirra fjölskyldna sem hafa verið grundvöllur að þeirri neyslukönnun sem gerð var 1978–1979. Hitt held ég að sé ljóst að sá vísitöluútreikningur sem hér er lagt til að lögfestur verði sé nær raunveruleikanum en sá sem eldri var enda þótt ljóst sé að hann er ekki nákvæmlega samkvæmt þeirri neysluvenju sem í dag er.
Í þessu frv. er gert ráð fyrir að í framtíðinni skuli Kauplagsnefnd eigi sjaldnar en á fimm ára fresti láta fara fram athugun á því hvort ástæða sé til að endurskoða grundvöll vísitölu framfærslukostnaðar. Í 3. gr. frv. segir að sú athugun skuli fyrst fram fara strax á næsta ári. Verði niðurstaðan sú að nm. telji að lokinni slíkri athugun að endurskoðunar sé þörf láti nefndin gera neyslukönnun til endurnýjunar á grundvelli vísitölunnar. Að fengnum þeim niðurstöðum — sé nefndin sammála — hefur Kauplagsnefnd — skipan hennar er óbreytt skv. 1. gr. frv. — heimild til að ákveða nýja framfærsluvísitölu án þess að til lagasetningar komi. Hins vegar er í 3. gr. gert ráð fyrir því að Kauplagsnefnd skuli gera ríkisstj. grein fyrir niðurstöðum til þess að hæ t sé að fylgjast með um framvindu þessara mála.
Ég sé ekki ástæðu, herra forseti, til að fjölyrða meira um þetta frv. Ég vísa til þess sem fram kemur í grg. með frv. Ég vil aðeins láta þess getið að þar sem um er að ræða áhrif framfærsluvísitölu á lánskjaravísitölu væri mjög æskilegt að hægt væri í byrjun næstu viku að ljúka afgreiðslu þessa máts. Hv. Ed. sýndi málinu þann velvilja að koma afgreiðslu þess fram svo hratt sem mögulegt var einmitt út frá þessu sjónarmiði og ég vænti þess að samstarf við hv. Nd. geti orðið með sama hætti.
Að sjálfsögðu er ég reiðubúinn til þess, ef óskað verður eftir því, að veita n. sem fær þetta mál upplýsingar og sjá um að þeir aðilar, sem unnið hafa að því og geta lagt til upplýsingar, komi til viðræðna við n.
Að lokinni þessari umr., herra forseti, leyfi ég mér að leggja til að frv. verði vísað til 2. umr. og hv. fjh.- og viðskn.