01.11.1983
Sameinað þing: 11. fundur, 106. löggjafarþing.
Sjá dálk 485 í B-deild Alþingistíðinda. (352)

389. mál, málefni El Salvador á vettvangi Sameinuðu þjóðanna

Fyrirspyrjandi (Helgi Seljan):

Herra forseti. Ég þakka hæstv. heilbr.- og trmrh. skýr svör. Ég gerði grein fyrir því áðan og er það mjög ljóst að hér er um viðamikið starf að ræða, þó ég hefði kannske vænst þess að betur sæktist og fljótar ýmis vinna sem þessi nefnd hefur lagt hönd að og vissulega hefur verið til úrbóta.

Skýrslur hafa komið um tvö atriði sérstaklega, annars vegar bráðaþjónustuna. Þar hefur verið tekið á og ég fagna því og þakka það hvernig þar hefur verið unnið að mátum í heilbr.- og trmrn. og af yfirmönnum þeirra deilda sem um þessi mál fjalla sérstaklega. Hins vegar vitum við það að bráðaþjónustan verður í raun og veru ekki veitt nægilega vel og markvisst fyrr en búið er að breyta lögum um sjálfræðissviptinguna. Hér er um miklu viðkvæmari hluti að ræða en varðandi önnur sjúkratilfelli og því hef ég einnig spurt um það í annarri fsp., sem síðar mun svarað, hvað líði lögum um sjálfræðissviptinguna og endurskoðun þeirra laga.

Varðandi réttargeðdeildina, en hæstv. heilbr.- og trmrh. upplýsti að sent hefði verið erindi til dómsmrn. um það mál en engar frekari fréttir væri þar af að hafa — vil ég skora á hæstv. núverandi dómsmrh., sem er einn af flm. þessarar till., að taka nú þar upp þráðinn og vinna að því máli, því eitt af áhersluatriðunum, sem ég nefndi ekki áðan, í þeirri till. sem við fluttum hér á sínum tíma varðaði einmitt geðsjúka afbrotamenn og þann mikla vanda sem af því hefur skapast, athvarfi þeirra og meðferð.

Ég vil svo segja það að lokum að hér eru viss forgangsverkefni sem þarf að afmarka og vinna sérstaklega að. Ég tek sem dæmi áfangastaðina svokölluðu, þ.e. milli sjúkrahússins og þess að fara beint út í daglega lífið. Þessir staðir eru álitnir hin mesta nauðsyn fyrir fjölmarga sjúklinga og ég veit að eftir þeim er vissulega beðið.

Atvinnumálin eru vissulega snar þáttur í lífi þessa fólks. Þegar sjúklingarnir koma aftur út í lífið reynist þeim oft býsna torsótt að fá atvinnu vegna þess sjúkdóms sem þeir hafa þó læknast af. Og síðast en ekki síst varðandi fræðsluþáttinn, svo enn megi linna þeim fordómum, sem vissulega eru á undanhaldi gagnvart þessu, en enn þá eru í allt of ríkum mæli í þessu þjóðfélagi.