05.02.1985
Sameinað þing: 44. fundur, 107. löggjafarþing.
Sjá dálk 2625 í B-deild Alþingistíðinda. (2098)
241. mál, starfsemi húsmæðraskóla
Menntmrh. (Ragnhildur Helgadóttir):
Herra forseti. Með hliðsjón af niðurlagi ræðu hv. fyrirspyrjanda mun ég svara spurningunum, sem fyrir liggja í þeirri röð sem þær koma fram, svona:
1. Hversu mörg skólahús í landinu eru byggð fyrir húsmæðrakennslu og hve mikið er þetta húsnæði að rúmmáli?
Svarið er: 11 skólahús, rúmmál 41 145 rúmmetrar.
2. Hversu margir þessara skóla eru nú starfandi?
Svar: Sex skólar.
3. Hve margir nemendur stunda nú nám í húsmæðraskólum?
Svar: 117 nemendur í hússtjórnarnámi og 1000 á námskeiðum.
4. Hve margir kennarar annast kennslu þeirra?
Svar: 20 kennarar.
5. Eru einhverjir skólanna nýttir til annarrar starfsemi en húsmæðrakennslu?
Svar: Fimm.
6. Hve mikið húsrými er í Húsmæðraskóla Reykjavíkur og hvaða starfsemi fer þar fram?
Svarið við fsp. um starfsemina er þetta: Fyrir áramót eru rekin námskeið bæði með dag- og kvöldkennslu fyrir fullorðna og komast þar færri að en vilja. Í boði eru eftirtalin námskeið:
Vefnaður, 7 vikur, 94 kennslustundir.
Fatasaumur, 6–8 vikur, 27, 32 eða 52 kennslustundir.
Matreiðsla, 5 vikur, 52 eða 80 kennslustundir.
Stutt matreiðslunámskeið, tveggja eða þriggja daga. Þá eru tekin fyrir afmörkuð efni, t.d. gerbakstur, glóðarsteiking, smáréttir og fleira.
Eftir áramót er gefinn kostur á hálfs vetrar námi og hefur þá yfirleitt verið fullskipaður skólinn.
Húsnæði Húsmæðraskóla Reykjavíkur er bærilega rúmgott. Þetta er stórt og myndarlegt hús, eins og hv. þm. kannske veit, hér á horninu á Sólvallagötu og Blómvallagötu. Getur hv. þm. e.t.v. litið á það í heimleiðinni. Það er mjög myndarlegt og sérlega fallegt hús, viðeigandi umgerð um svo göfuga námsgrein sem hússtjórnarfræði eru.