24.04.1985
Efri deild: 59. fundur, 107. löggjafarþing.
Sjá dálk 4560 í B-deild Alþingistíðinda. (3834)
364. mál, jöfnun og lækkun hitunarkostnaðar
Helgi Seljan:
Virðulegi forseti. Ég sé það að í mörgu er það rétt, sem hv. 11. landsk. þm. lét hafa eftir sér, að full ástæða væri til að líta eftir piltinum í ráðherrastól; hæstv. iðnrh. Sverri Hermannssyni. M. a. í þessu efni þegar sá talnaglöggi maður kemur hér með sínar upplýsingar um raungildi þessa kostnaðar og fær hann niður um meira en 50%, eins og hann rakti hér áðan, á meðan hæstv. iðnrh. með öllum sínum sérfræðingum kemur þessu ekki niður nema um 12%. Því að vitanlega varð kaupgjaldshækkun á s. l. hausti um leið og taxtahækkunin varð, svo að þar jafnaðist það nokkurn veginn út og var talið af iðnrn. þá að nokkurn veginn jafnaðist út sú hækkun sem varð á upphitunartöxtunum og svo aftur sú hækkun sem varð á kaupgjaldstöxtum þannig að það hefði nokkurn veginn átt að vera sambærilegt.
Ég ætla ekki að fara út í deilur um hvað menn sögðu um orkujöfnunargjaldið, að því ætti að skila öllu og stórfelldar upphæðir ættu þar að koma inn í. En það sögðu menn auðvitað þá óspart og gerðu að miklu máli. Ég heyri á hv. 11. landsk. þm. að hann er síður en svo ánægður með þetta mál í dag, þrátt fyrir þær upplýsingar sem hér liggja fyrir frá rn., hæstv. iðnrh. og samverkamanni hans. Hv. 11. landsk. þm. hvetur menn mjög til þess að sameinast sér í því að herja á hæstv. iðnrh. til að gera betur. Ekki skal standa á mér að liðsinna honum í þeirri — að því er virðist — vonlitlu baráttu við hæstv. ráðh. að fá fram þá leiðréttingu sem hann vill fá fram á þessum málum.
Ég ætla ekki heldur að fara út í það, sem hv. þm. hefur mjög oft gert sér að leik hér, að vitna í ákveðið bréf til Rafmagnsveitna ríkisins frá hæstv. fyrrv. iðnrh. og að það bréf þýddi í raun og veru ákvörðun um taxta til upphitunar. Vitanlega er það fjarstæða og það veit hv. þm. mjög vel. (Gripið fram í.) Nei, þó að reynt hefði verið að ná þessum halla niður fyrir Rafmagnsveitur ríkisins, þá hlaut það að verða gert með þeim hætti að neytendur fengju með öðrum aðgerðum bættan þann aukakostnað sem þar af yrði, t. d. með auknum niðurgreiðslum eins og hefur verið gert í valdatíð þessarar stjórnar. Vitanlega veit hv. þm. að þarna hefðu komið aðrar aðgerðir á móti til þess að létta neytendum þann kostnað sem hefði orðið af því að jafna þennan halla. Ég veit að hann ætlar ekki hv. þm. Hjörleifi Guttormssyni að hafa ætlað sér að leggja þennan kostnað alfarið á neytendur í landinu, m. a. vegna þess að hann vissi um tillögur hans um auknar niðurgreiðslur í þessu efni. Og þó að gott væri að nota þetta í kosningahríðinni þá veit ég að hv. þm. er það sanngjarn að honum dettur ekki í hug að halda þessu fram í dag, að það sé ekki hægt að koma þarna á móti niðurgreiðslu til neytenda, þannig að þeir bæru ekki þarna skarðan hlut. Ég er alveg sannfærður um að hann samþykkir það með mér að vitanlega hefði það komið til.
Hitt er svo annað mál að þessar tölur sem hv. þm. fór með um raunkostnað, og við það vil ég að sjálfsögðu miða, þær fara hreinlega ekki saman við þær tölur sem við erum með frá hæstv. iðnrn. Þetta bil hefur ekki gleikkað svo núna við síðustu taxtahækkun, það veit hv. þm. mjög vel, taxtahækkun sem kom sérstaklega í framhaldi af kaupgjaldshækkunum haustsins.