09.05.1988
Sameinað þing: 81. fundur, 110. löggjafarþing.
Sjá dálk 7746 í B-deild Alþingistíðinda. (5831)
467. mál, vegáætlun 1987--1990
Albert Guðmundsson:
Hæstv. forseti. Að gefnu tilefni frá hv. 3. þm. Vestf. Karvel Pálmasyni vil ég vitna í sömu töflu í sömu skýrslu og hann gerði til þess að sanna hve lítið var lagt til vegamála á árinu 1984. Útgjöld til vegamála samkvæmt því sem hann benti á á bls. 42 í þessari skýrslu samgrh. um framkvæmd vegáætlunar 1987 voru þessi, með leyfi forseta:
Útgjöld til vegamála sem hlutfall af þjóðarframleiðslu á árunum 1964–1987. Þar kemur fram að 1984 er framlagið ekki 1,4 af þjóðarframleiðslu heldur 1,79, tæpir 1,8, og ég vil bæta því við að á árinu 1984 var fjárlagagerðin tekin upp í byrjun árs og þá var bætt við þetta þannig að það mætti nærri því þeirri prósentu af þjóðarframleiðslu sem Alþingi hafði stefnt að sem var í kringum 2,1 eða 2,2, ef ég man rétt. Hæstv. þáv. samráðherra og þáv. félmrh. Alexander Stefánsson, gæti þá staðfest það ef menn eru ekki ánægðir með það sem ég segi. Þetta er um hlutfall til vegamála á árinu 1984 sem hv. þm. vitnaði til og samkvæmt þeirri töflu sem hann vitnaði til fór hann með rangt mál.
Aftur á móti hefur þjóðarframleiðsla aukist gríðarlega mikið og á árinu 1987 hríðminnkar prósentan. Eins og segir hér á töflunni dettur hún niður í 1,16. Það er hins vegar ekki þar með sagt að krónutölulega hafi hún minnkað vegna þess að þjóðarframleiðsla hefur aukist það mikið. En ég ætla ekki að taka þátt í þeim dansi sem hv. þm. Karvel Pálmason virðist vera að stofna til um meting á milli ára, á milli manna og á milli landshluta, maður sem hefur lýst sig andstæðan ríkisstjórninni en reynist í reynd einhver alþarfasti þjónn ríkisstjórnarinnar eins og kom fram hjá hv. þm. Stefáni Valgeirssyni. Karvel Pálmason er meistari í að tala á móti og greiða atkvæði með, það er orðið þjóðarsport þeirra Vestfirðinga sem fylgja honum að máli.
Þá er í næstu töflu, af því að hann vitnaði í hana á bls. 42, talað um heildarútgjöld til vegamála á árunum 1964–1987 og ég sé ekki betur en að árið 1988 sé svona í lægra lagi. Það er hærra 1971, 1972, 1973 og 1974. Það er hærra 1981 og síðan kemur 1984. Það er hærra framlag 1984 en öll hin árin. Ef við förum aftur á bls. 43 í sömu skýrslu, sem vitnað er í svona á niðrandi hátt, sé ég ekki betur en að heildarkostnaður við sumarviðhald og vetrarþjónustu 1964–1987 hafi aldrei verið meira framlag en árið 1984, aldrei. Ef við tökum þá á sömu blaðsíðu bls. 43 kostnaðinn við sumarviðhald 1964–1987 er aðeins 1985, sýnist mér, hærra en 1984. Það gæti verið að súlurnar séu ekki alveg jafnar 1987. Ég sé ekki hvort er hærra, hvort fær meira framlag 1987 eða 1984, þannig að hv. þm., samkvæmt þeim bls. í skýrslunni sem hann vitnaði í, hefur farið með rangt mál. Það er því ekkert annað fyrir hv. þm. en að fletta upp þessum blaðsíðum sem þm. vitnaði til, og lesa þær og bera saman það sem þar er, þá er þetta ljóst mál.