26.04.1909
Neðri deild: -1. fundur, 21. löggjafarþing.
Sjá dálk 1350 í B-deild Alþingistíðinda. (1834)
51. mál, stofnun landsbanka
Sigurður Sigurðsson:
Eg vil að eins stuttlega gera grein fyrir atkvæði mínu viðvíkjandi viðaukatill. á þskj. 634. Eg verð að lýsa yfir því, að eg get ekki greitt atkvæði með henni. Ekki svo að skilja, að núverandi bankastjóri eigi ekki eftirlaun skilið, heldur af því, að mér finst það ekki eiga við, að hnýta eftirlauna-ákvæðum viðvíkjandi honum inn í þetta frumv. Mér getur ekki dulist, að svo muni litið á, að í því felist, segi alls ekki, að það sé svo, bending fyrir manninn að segja af sér starfinu, en það verð eg að álíta, að sé í alla staði óviðeigandi. Eg álít, að nægur tími sé til að ákveða eftirlaun fyrir þennan mann, þegar hann segir þessum starfa lausum, og mun eg því sem sagt greiða atkvæði á móti þessari breyt.till., sem ræðir um eftirlaun handa núverandi bankastjóra.