19.02.1909
Neðri deild: -1. fundur, 21. löggjafarþing.
Sjá dálk 1436 í B-deild Alþingistíðinda. (1964)
94. mál, stjórnarskipunarlög
Skúli Thoroddsen:
Það er einatt fallegt að vilja, sem hinn hæstv. ráðh. (H. H.), skapa ánægju og gleði í landinu. En mér virðist, að þeim tilgangi mundi hann hafa náð miklu betur, hefðu ekki stjórnarskrárbreytingarnar verið samtvinnaðar sambandslagafrumvarpinu, sem hæstv. ráðh. (H.H.) veit, að ekki nær fram að ganga, fyr en hver veit hve nær.
Að því er snertir ákvæði frumv. um það, að skapa »konservativa« efri deild virðast mér þau alt annað en frjálsleg, og vil eg vona, að þingið aðhyllist ekki það fyrirkomulag.
Enn fremur finst mér, að hæstv. ráðh. (H. H.) hafi ekki komið frjálslega fram gagnvart kvenfólkinu, þar sem hann ekki hefir viljað fara lengra, en svo, að taka upp í stjórnarskrána ákvæði um það, að veita mætti kvenfólki kosningarrétt með sérstökum lögum, og vil eg leyfa mér að lesa upp kafla úr athugasemdunum við frumv. því viðvíkjandi:
»Það þykir of bráð breyting, að veita konum kosningarrétt jafnt karlmönnum þegar í stað, af því að þær eru margar hverjar svo lítt undirbúnar undir hluttöku í landsmálum, og þykir æskilegast, að rétturinn verði að eins veittur smámsaman, eftir aldurs-flokkum«.
Eg er á alt annari skoðun í þessu efni en hæstv. ráðherra, því að eg álít, að kvenfólkið sé alveg eins hæft til þess að öðlast kosningarrétt og kjörgengi, eins og karlmennirnir, og vona eg fastlega, að kvennréttindamálið verði þannig undirbúið fyrir næsta þing, að það geti þá rekið smiðshöggið á það.