06.05.1911
Neðri deild: -1. fundur, 22. löggjafarþing.
Sjá dálk 1732 í B-deild Alþingistíðinda. (2074)
133. mál, ritsíma- og talsímakerfi Íslands
Jón Þorkelsson:
Menn hafa kvartað yfir því, að vita ekki hvað stöð á Grænlandi kostar. Eftir manni, sem skyn ber á þetta mál, hefi eg það, að hún muni kosta 6070 þús. kr., en stöð í Kanada 2030 þús kr. meira.
Eg skal geta þess alment, út af því sem oft heyrist hér, að ýmsar skrítnar tlllögur séu hér fram bornar, að þetta frumvarp er eitt hið undarlegasta, sem fram hefir komið á þessu þingi. Nú þegar sem mestur ágreiningur er um loftskeyti og síma, kemur frumvarp þetta eins og hagl úr heiðríkju. Það mun ekki vera tilviljun ein, hvorki að því er tekur til flutningsmanns né símastjórans. Enginn má þó taka orð mín sem aðdróttun; eg efast ekki um, að þeir telji þetta rétt eftir þeirra sjónarmiði, þó að það sýnist eiga miður vel við, að koma með þetta nú, þegar ýmsum er farið að þykja sem ritsíminn sé orðinn eins og nátttröll menningarinnar, sem sé að daga uppi. Eg tel lang réttast að fella þetta mál nú, því að gagnslaust er að tildra upp dauðum bókstafslögum, enda nær frumvarpið varla fram að ganga á þessu þingi. Það er eftirtektavert, hversu hreppapólitíkin vaknar í almætti sínu við þetta frumvarp, jafnt hjá loftskeytamönnum sem hinum; þarf ekki annað en að benda á tillögu vinar míns háttv. þm. N.-Þing. (B. Sv.), sem eg ætla einlægan loftskeytamann.
Eg tel frumvarpið með öllu óþarft og óhæfilegt og mun hallast að þeirri góðu tillögu sessunautar míns, háttv. 1. þm. S.-Múl. (J. J.), að taka málið út af dagskrá til næsta þings.