24.03.1911
Efri deild: -1. fundur, 22. löggjafarþing.
Sjá dálk 671 í B-deild Alþingistíðinda. (386)
86. mál, sjúkrasamlög
Ráðherra (Kr. J.). Háttvirtur framsögumaður hefur þegar bent deildinni á það sem eg ætlaði að benda henni á, en það, er að hér er lagður skattur á landsjóð, sem getur orðið talsverður; það er því varhugaverðara sem hér eru fleiri lög á ferðinni, sem fara í sömu átt, og vil eg þar til nefna lög um heyforðabúr, þar er öðrum skatti laumað inn á landsjóðinn og enginn veit, hve hár hann getur orðið.
Aftur á móti er ekki séð fyrir neinum tekjuauka fyrir landssjóð, enda þótt yfir landinu vofi mikið tekjutap á næstkomandi árum og ýms lög, sem nú eru fyrir þinginu, leggi veruleg útgjöld á landsjóðinn.
Ef til vill er deildinni kunnugt um, að um síðustu árslok gat landsjóður tæplega int af hendi skyldugjöld. Peningaskorturinn var þá svo mikill.
Það er ekki til neins að vera að leyna því. Verður að segja það eins og það var. Og það er nú einnig mesta áhyggjuefni þeirra manna í stjórnarráðinu, sem þetta hafa með höndum, að eigi verða peningaþrot í landssjóði. Eg vildi að eins leyfa mér að vekja athygli hinnar háttvirtu deildar á þessari hlið málsins.