22.08.1912
Neðri deild: -1. fundur, 23. löggjafarþing.
Sjá dálk 681 í B-deild Alþingistíðinda. (1146)
104. mál, einkasöluheimild á steinolíu
Flutningsmaður(Jón Ólafsson):
Herra forseti! Eg skal ekki þrátta við hæstv. ráðherra (H. H.) um að frv. það sem hér lá fyrir í gær, sé betra en þetta, hitt frv. er fallið svo að það er einungis málalenging á tæpum þingtíma að þrátta um það. Hér er aðeins um tvent að velja, annað hvort að taka þessu frv. eða þá að gera ekkert til að bæta úr vandkvæðunum. Það hvílir mér vitanlega engin skylda á neinum að flytja hér inn steinolíu, né hafa hana fyrirliggjandi á hverri höfn, kaupmenn verða sjálfir að vera sér út um hana og panta hana og það gætu þeir ekki síður gert þó að landið tæki að sér einkaleyfi til innflutnings; landið ætti þá bara að sjá um, að til væri nóg steinolía einhvers staðar á landinu til dæmis í Reykjavík og væri þá fult svo auðvelt fyrir kaupmenn að panta olíu úr Reykjavík í stað þess, eins og flestir þeirra gera nú, að panta hana frá Steinolíufélaginu danska. Ekki væri það nein frágangssök, þótt kaupmenn ættu að borga út í hönd, eg býst við, að þeir mundu flestir hafa einhver ráð með það og þá getur alls engin skulda verzlun komið til greina.