23.08.1912
Neðri deild: -1. fundur, 23. löggjafarþing.
Sjá dálk 881 í B-deild Alþingistíðinda. (1328)
100. mál, fiskveiðagæsla fyrir Suðurlandi
Flutningsm. (Sigurður Sigurðsson); Sjómenn í veiðistöðunum austan fjalls fólu okkur þingmönnum kjördæmisins að fara þess á leit við stjórnina að hún gerði sitt til að varðskipið kæmi oftar á fiskveiðasvæðin á Eyrarbakka-bugtinni en að undanförnu. Vertíðin þar um slóðir stendur venjulega yfir mánuðina marz, apríl og fram í miðjan maí. Sérstaklega þann tímann væri nauðsynlegt að varðskipið kæmi þar oft og liti eftir veiðum botnvörpunganna og annara skipa sem þar halda sig. Hluturinn er sá að menn þar eystra hafa oft liðið skaða á veiðarfærum sínum og afla, af botnvörpungum, ekki sízt seinni árin síðan menn fóru nota þorskanetin, Eins og þeir vita, er sjómennsku hafa stundað, eru þau látin liggja í sjónum dag og nótt lengst af alla vertíðina, Kemur það oft fyrir eystra, þegar menn eru nýkomnir í land á skipum sínum að þá koma beinvörpungar og leggja vörpur sínar einmitt á sama svæði og eyðileggja heilar þorskanetatrossur. Af þessu bíða menn mikinn skaða, eins og skiljanlegt er, bæði á afla sínum og veiðarfærum. Það er því fylsta ástæða til að þessu sé eitthvað sint, og að stjórnin geri sitt til að varðskipið komi oftar á þessar slóðir en það hefir gert, að minsta kosti tvær síðustu vertíðirnar. Það er kunnugra en frá þurfi að segja að varðskipið liggur oft inn á höfnum bæði hér í Reykjavík og annarsstaðar og það hefir í för með sér að botnvörpungarnir eru farnir að gera sér æði dælt við landhelgina.
Eg vona því, að tillagan svo hógvær sem hún er, fái góðar undirtektir „og hin háttv. deild samþykki hana.