08.09.1915
Efri deild: 55. fundur, 26. löggjafarþing.
Sjá dálk 417 í B-deild Alþingistíðinda. (523)
58. mál, ritsíma og talsímakerfi Íslands
Ráðherra:
Hv. þm. Vestm. (K. E.) vildi skilja 6. gr. ritsímalaganna svo, að heimilt væri að byggja hvernig stöð sem væri, en það er vafalaust, að ekki má byggja stöð, sem nær til útlanda, fyrr en eftir 20 ár, án samkomulags við Stóra Norræna. Því er ekki til neins að hugsa um það, því sagt er að leitað hafi verið hófanna við Stóra Norræna, og það hafi tekið fjarri að láta nokkuð af sínum rjetti. Um hitt atriðið, að engir óskuðu þessa, þá get jeg ekki skilið að svo sje; útgjörðarmenn eru margir með því að fá stöðina, og eins er mjer kunnugt um Eimskipafjelag Íslands, sem hefir loftskeytatæki á sínum skipum. Auk þess er fjöldi útlendra togara hjer í kring um land, sem hafa tækin, og mundu hafa gagn af stöðinni. Hitt er ósagt, hvort hún mundi borga sig fyrst í stað. Eins líklegt að tap yrði að henni.
Viðvíkjandi fyrirspurn hv. þm. Seyðf. (K. F.) skal jeg taka það fram, að jeg er ekki sjerfræðingur í þessari grein, en þeir 2 menn, er jeg hefi mína vitsku úr, draga það ekki í efa, að stækka megi stöðina. Annar þessara manna var landsímastjórinn og hinn var umboðsmaður
Marconifjelagsins í Kaupmannahöfn. Telja þeir engan efa á því, að þó stöðin sje fyrst bygð lítil, þá megi stækka hana síðar.