30.04.1923
Neðri deild: 53. fundur, 35. löggjafarþing.
Sjá dálk 307 í C-deild Alþingistíðinda. (2163)
149. mál, löggiltir endurskoðendur
Flm. (Bjarni Jónsson):
Jeg er orðinn þreyttur á að tala við hv. 1. þm. N.-M. (þorstJ) og þarf ekki fleira við hann að segja. Það var hann, sem dró nafn látins manns hjer inn í umræðurnar, en ekki jeg. Hann vildi koma öllum þessum vafasömu afrekum Sambandsins á Hallgrím Kristinsson. Mjer var það ekki kunnugt, að allar ákvarðanir Sambandsins væru honum að kenna. Jeg minnist þess nú, að þegar samvinnuskólinn kom fyrst til greina opinberlega, þá mælti þáverandi form. Sambandsins, Pjetur Jónsson, fyrir styrk til skólans á Alþingi. Þó að hv. þm. (ÞorstJ) viti þetta að líkindum, þá vill hann velta öllu á einn mann. Hv. þm. (ÞorstJ) ræður sjer ekki fyrir reiði; enda er það alt ósatt, sem hann segir hjer. Gæti jeg trúað, að það væri jafnmikil skekkja í þessu sem öðru, er hv. þm. hefir sagt hjer í dag, því að það hefir alt ósatt verið. Neitar hann nú, að tvisvar 3000 sje 6000. Sýnir þetta reikningskunnáttu barnakennarans.
Svo kom hv. þm. V.-Sk. (LH), til þess að gæta drengskapar míns. Segir hann það ódrengilegt, að jeg fann að því í framsöguræðu minni, sem aflaga fór. En gæta skal þessi hv. þm. (LH) þess, að drengskapur hans verði ekki einhvern tíma minni en minn, og er það uggur minn, að svo kunni að fara.
Hv. þm. Ísaf. (JAJ) sagði, að ræða mín hefði verið nokkuð sjerstæð. Jeg veit ekki, hvað hann meinar með því. En skilja ætti hann það, að ekki er hægt að taka öll dæmi, sem til eru, máli sínu til sönnunar, heldur verður maður að taka þau ein, sem næg eru og einna best sanna það, er maður vill sanna með þeim.
Er líkast því, sem hv. þm. verði allir á hjólum og komi á þá taugakvik, þegar Sambandið eða skólinn þeirra er nefndur og bent á eitthvað, sem aflaga fer þar. Mun þetta stafa af því, að þeim finst þetta Samband miklu merkilegra en það í raun og veru er.