17.03.1924
Efri deild: 21. fundur, 36. löggjafarþing.
Sjá dálk 221 í C-deild Alþingistíðinda. (1909)
65. mál, Alþingistíðindi, niðurfelling umræðuparts
Frsm. minnihl. (Jónas Jónsson):
Ræða sú, eftir hv. 4. landsk., sem jeg las upp úr áðan, er slíkur brunnur af röksemdum gegn frv. þessu, að ausa mætti þar úr hverri fötunni af annari, yfir stuðningsmenn þess. Vænti jeg, að fyrverandi þm. Vestm. (JM) gangi svo frá málstað hv. 4. landsk. og skoðanabræðra hans, að jeg þurfi þar litlu við að bæta.
Hvort kvennfundurinn norðlenski hafi lýst yfir vantrausti eða bara óánægju gagnvart hv. 6. landsk. (IHB), verða rjettir aðiljar að koma sjer saman um. En jeg vona, að fundarkonurnar norðlensku fái þessar skýringar hv. 6. landsk. (IHB) einmitt í gegn um Þingtíðindin — og er hjer ein ástæða m. a. til þess, að haldið verði áfram prentun þeirra. Þar sem hv. 6. landsk. notaði tækifærið til að lýsa hinum mikla áhuga sínum á skólamálum kvenna, þá vil jeg minna hv. þm. (IHB) á það, að hann studdi að því á síðasta þingi, að till. minni um stofnun húsmæðraskóla var vísað til stjórnarinnar og hinn eini skóli í Rvík í þeirri grein, með 12 „plássum“, látinn nægja húsmæðraefnum vorum.
Hv. frsm. meirihl. (EP) sagði, að hinar almennu ástæður fyrir máli þessu hefðu gerbreytst frá 1909. Þær ástæður, sem núverandi hv. 4. landsk. (JM) bygði á mótmæli sín gegn því að fella niður prentun umræðupartsins, eru óbreyttar. Þingtíðindin eru sami liðurinn í hinu pólitíska uppeldi þjóðarinnar nú sem þá. Hin sama er þörf þeirra fyrir sögurannsóknir, hin sama fyrir dómara og aðra lögskýrendur. — Og þá átti líka að fella niður prentunina í sparnaðarskyni. Barlómurinn var engu minni þá en nú. Sami hv. þm. (EP) segir, að þar, sem hann þekki til, sjeu Þingtíðindin lítið lesin. Aftur á móti segja aðrir hv. þm., að þeir viti til, að þau sjeu mikið lesin. Hvað sýnir þetta? Ekki annað en að kjósendur hans vita hjer um bil, hvað mikið af skemtilegu efni þessi hv. þm. (EP) muni leggja til í Þingtíðindin. Þeir þekkja sína heimamenn og hafa fengið nóg af því ræðuglundri. Aðeins önnur ástæða er til um stuðningsmenn hv. 1. þm. Rangæinga, að þeir sjeu svo óþroskaðir í stjórnmálum, að þeir vilji ekki fylgjast með störfum þingsins. Sami hv. þm. (EP) segir ennfremur, að ekki sje merkilegt, þó að hv. 4. landsk. (JM), sem er í stjórn flokks hans, hafi snúist hugur í máli þessu. Þetta er alveg rjett. En þá getur hann sjálfur alveg eins snúist. Því að eftir höfðinu dansa limirnir.
Þá slapp hv. þm. (EP) ekki eins vel frá grískudósentinum og hann vildi. Er engin ástæða til að ætla, að það mál hefði dagað uppi, þó að því hefði verið vísað til nefndar. Það hefði að sjálfsögðu farið til allshn., og þar á hann einmitt sæti sjálfur, svo að hann hefði getað ráðið því, að nefndin legðist ekki á málið, ef honum er svo ant um afnám embættisins sem hann lætur. Sjerstaklega var ástæða fyrir hann að drepa ekki það frv., þar sem æðsti maður flokks hans hafði í hv. Nd. borið fram frv. um háskólann, sem m. a. gerði ekki ráð fyrir afnámi embættisins í bráð. Jeg læt hjer staðar numið, en treysti því, að hin þungu rök hv. 4. landsk. (JM) gegn hans eigin frv. verði því að bana.