25.03.1926
Neðri deild: 40. fundur, 38. löggjafarþing.
Sjá dálk 62 í B-deild Alþingistíðinda. (8)
1. mál, fjárlög 1927
Forsætisráðherra (JM):
Jeg var því miður ekki staddur hjer í deildinni, þegar þessi umræða byrjaði. En mjer hefir verið sagt, að háttv. þm. Str. (TrÞ) hafi meðal annars átalið stjórnina fyrir, að áfengi hafi verið skilað aftur til smyglara. Jeg veit satt að segja ekki, hvað hann á við, ef hann hefir sagt þetta. Það hefir aldrei neitt slíkt komið fyrir, svo stjórnin viti.
Þá var mjer líka sagt, að hann hefði fundið að því, að þagað hefði verið við árás á dómara. Jeg veit ekki heldur, hvað hann á þarna við. Hv. þm. Str. til leiðbeiningar skal jeg geta þess, að áður var sú tíð, að ekki var þagað yfir meiðyrðum um dómara og aðra embættismenn. Það var jafnan svo, að landsstjórnin skipaði dómurum og öðrum embættismönnum að fara í mál, ef á þá var ráðist með meiðyrðum, og þeir fengu gjafsókn, en sá, sem á móti var, varð að borga. Þetta þótti stundum misnotað af stjórninni, og því var tekið úr lögum annarsvegar rjettur embættismanna til gjafsóknar í meiðyrðamálum og hinsvegar rjettur stjórnarinnar til að skipa embættismönnum að fara í mál út af meiðyrðum. Síðan (það var 1907) hefir auðvitað ekki verið lagt fyrir embættismenn að fara í meiðyrðamál. Til þess hefir stjórnin ekki lagaheimild.
Jeg sje því ekki, hvernig hægt er að nota það til árása á stjórnina, þó ekki hafi verið skipað fyrir um slíkt mál nú.
Annars hefir það oft komið fyrir áður, bæði hjer á landi og annarsstaðar, að ráðist hefir verið á bæði dómara, dómsmálaráðherra og aðra embættismenn, ýmist í bæklingum eða á annan hátt. En menn kiptu sjer ekki upp við það. Jeg minnist þess t. a. m., að á Nellemann ráðherra var ráðist óþyrmilega í víðlesnum bæklingi, en jeg minnist þess ekki, að bæklingi þessum væri neitt skeytt. Sjálfur hefi jeg orðið fyrir meiðyrðum út af dómstörfum mínum, og skifti jeg mjer ekki af. Varð jeg ekki var við, að jeg yrði fyrir neinum álitshnekki þar fyrir.
Sje jeg svo ekki ástæðu til að hafa þessi orð mín lengri.