03.05.1929
Neðri deild: 60. fundur, 41. löggjafarþing.
Sjá dálk 641 í B-deild Alþingistíðinda. (610)
3. mál, kosningar í málefnum sveita og kaupstaða
Hákon Kristófersson:
Mjer þótti það satt að segja merkilegt, að minn ágæti gamli vinur, hv. þm. Dal., skyldi vilja halda því fram, að með 6. lið 1. gr. væri verið að útiloka marga fátæka ágætismenn frá kosningarrjetti. Í þessum lið er svo ákveðið, að þeir menn skuli ekki hafa kosningarrjett, sem standa í skuld fyrir þeginn sveitarstyrk vegna leti, óreglu eða hirðuleysis sjálfs sín. Með þessu er auðvitað verið að útiloka fátæka menn, en að margir ágætir menn heyri þarna undir, því verð jeg algerlega að andmæla. Það getur alls ekki átt sjer stað.
Það kann auðvitað vel að vera, að margir ríkir menn sjeu óreglumenn, en að ónytjungar verði ríkir, því trúi jeg ekki. Það gæti þá því aðeins átt sjer stað, að þeir hefðu fengið fje að erfðum eða að gjöf. Mjer finst það langeðlilegast, að þeir, sem borga í sveitarsjóðina, fái líka að ráða, hvað gert er við þá. Það nær engri átt að láta letingja og slæpingja hafa þar íhlutunarrjett. Og jeg var satt að segja aldeilis hlessa, þegar jeg heyrði hv. þm. Dal. tala um það sem einn lið af sínu frjálslyndi, að þessir menn ættu að hafa atkvæðisrjett við allar kosningar. Honum getur varla verið alvara. Þegar maður heyrir þessu haldið fram hjer í hv. deild, og það í nafni frjálslyndisins, þá er tæplega hægt á það að minnast án þess að hlæja, og það þó í hlut eigi aðrir eins alvörumenn eins og jeg. (Hlátur). Jeg fyrir mitt leyti er alveg viss um, að enginn verður sakaður um skort á frjálslyndi, þó að hann sje á móti þessu og greiði því ekki atkv.