17.01.1930
Sameinað þing: 1. fundur, 42. löggjafarþing.
Sjá dálk 8 í B-deild Alþingistíðinda. (595)
Minning látinna sjómanna
Forsætisráðherra:
Í síðastliðnum mánuði átti Hennar Hátign drottningin hálfrar aldar afmæli. Af hálfu ríkisstjórnarinnar færði konungsritari henni að gjöf frá Íslandi málverk af Skjaldbreið eftir Jón Stefánsson málara. Þessa tilefnis hefir mér borizt bréf frá Hennar Hátign, ritað á íslenzku, þar sem ég er beðinn að flytja Íslendingum kveðju og þökk sem ég hér með geri.
Ennfremur skal ég geta þess, að á nýársdag bárust mér kveðjuskeyti frá forsætisráðherra Danmerkur og forsætisráðherra Noregs. Þeir minnast sérstaklega þúsund ára hátíðar Alþingis og árna íslenzku þjóðinni allra heilla á hátíðarárinu. Af Íslands hálfu svaraði ég um hæl þessum árnaðaróskum frá frændþjóðunum.
Þar sem svo hefir farið enn, sem stundum fyrr, að skipi hefir seinkað, sem flytur alþingismenn til þings, þannig að enn eru ókomnir sex alþingismenn, verður, í samráði við aldursforseta, ekki frekar gert að þessu sinni. Fundinum er frestað til næstkomandi þriðjudags, stundu eftir hádegi.
Þriðjudaginn 21. janúar, kl. 1 miðdegis, var fundinum fram haldið. Voru þá til þings komnir þeir þingmenn, sem ókomnir voru við þingsetningu, aðrir en Þorleifur Jónsson, þm. A.-Sk. Auk hans var fjarstaddur Sigurður Eggerz, þm. Dal., sem boðað hafði veikindaforföll.