13.03.1931
Neðri deild: 23. fundur, 43. löggjafarþing.
Sjá dálk 852 í C-deild Alþingistíðinda. (1978)
118. mál, innheimta útsvara í Reykjavík
Flm. (Jón Ólafsson):
Þetta frv. er borið fram samkv. óskum bæjarstjórnar Reykjavíkur, og ástæðan til þess að það kemur fram er sú, að menn hafa gegnt treglega skyldu sinni um greiðslu útsvara.
1924 var samþ., að menn skyldu greiða 1% dráttarvexti á mánuði. Meðan þessi lög voru í gildi, sáu menn sér hag í að greiða útsvörin í tæka tíð, enda gekk útsvarsinnheimta þá vel, einkum frá hinum stærri gjaldendum. En 1926 voru dráttarvextirnar lækkaðir niður í 1/2% á mánuði. Þar með er orðinn hagur fyrir alla hina stærri gjaldendur að draga að greiða útsvör sin og hafa fé sitt heldur í rekstri. Vextir í bönkum hafa hingað til verið allt að 8%, og hefir því komið hart niður á bænum að þurfa að taka lán með slíkum kjörum, en eiga aftur fé hjá bæjarbúum, er þeir hafa greitt aðeins 6% af, og auk þess hefir oft verið miklum erfiðleikum bundið að fá lán upp í vanskil gjaldenda.
Nýmæli er það í frv. að hafa 5 gjalddaga á ári, í stað tveggja áður. Mönnum kemur betur að fá að greiða útsvör sin smátt og smátt, og því hefir orðið að samkomulagi að leggja til, að gjalddagarnir verði fimm á góðum tíma, þegar fólk hefir helzt peninga. Ég vænti þess, að frv. verði, að lokinni umræðu, vísað til 2. umr. og allshn.