07.08.1931
Neðri deild: 23. fundur, 44. löggjafarþing.
Sjá dálk 1255 í B-deild Alþingistíðinda. (2043)
64. mál, stækkun lögsagnarumdæmis Reykjavíkur
Frsm. (Jón Ólafsson]:
Af því að frv. er að ganga hin síðustu skref út úr d., þá sé ég ekki ástæðu til að fræða hv. þm. Mýr. í málinu yfirleitt, en mér vitanlega hefir það aldrei verið talið fjárhagslegt hagsmunamál fyrir Rvík að fá þennan skika. En það er annara hagsmuna að gæta þar, nefnilega þeirra, að verða ekki skemmdir af öðrum. Og það getur líka verið hagsmunamál að sjá um, að svo sé ekki, að aðrir komi og skemmi fyrir manni. En hv. þm. ætti að vera ljóst, að þetta þorp er svo samgróið Rvík, að það verður að gæta strax þess samræmis, sem á að verða í framtíðinni. En hér er ekki verið að ásælast tekjur eða eignir neins, frekar en þörf gerist.
Hv. þm. G.-K. áleit, að hreppurinn og sýslan misstu þarna tekjulið svo mikinn, að það var að heyra engu líkara en að hinir partar sýslunnar lifðu á þessum skika. En það mun sönnu nær, að Rvík þurfi í byrjun að leggja fram fé til rafmagns og vatnsveitu o. fl., sem skikinn borgaði svo á sínum tíma. Og þó að ég vildi hafa þessa heimild til skaðabóta, þá álít ég, að hann eigi engar bætur að fá.
Manni dettur í hug að brosa, þegar verið er að tala um að leggja Mosfellssveit undir Rvík. Satt að segja vildi ég sízt ágirnast hana af öllu, jafnvel þó Rvík væri lýðríki.