26.04.1932
Efri deild: 60. fundur, 45. löggjafarþing.
Sjá dálk 248 í C-deild Alþingistíðinda. (3024)
56. mál, vegur milli Hafnarfjarðar og Suðurlandsbrautar
Frsm. (Páll Hermannsson):
Hv. flm. hefir nú frá sínu sjónarmiði fært fram ýmsar ástæður, sem honum virðast mæla með því, að það eigi að hefjast handa og byggja nýjan veg milli Hafnarfjarðar og Suðurlandsbrautar, eða í rauninni milli Hafnarfjarðar og Reykjavíkur. Hv. flm. vildi halda því fram, að það mundu liggja einhverjar aðrar ástæður fyrir áliti vegamálastjóra heldur en þær, sem fram eru teknar í skýrslu hans. Ég vil ekki blanda mér inn í það atriði, því ég veit ekkert um það. Mér skilst helzt á honum, að þessar ástæður muni vera þær, að vegamálastjóri taki hæfilegt tillit til þess, hvaða hagræði það yrði Hafnarfirði og máske austursveitunum líka, ef nýi vegurinn yrði til þess að auka viðskiptin. Það er nú vitanlega gott fyrir austursveitirnar að eiga völ á fleirum en einum stað til viðskipta, en mér skilst samt, að Reykjavík muni allra hluta vegna hljóta að sitja fyrir höfuðviðskiptunum. Það gera svo margar ástæður, sem fyrir hendi eru. Ég verð að álíta, að nýr vandaður vegur milli Reykjavíkur og Hafnarfjarðar yrði alveg að byggjast á þeirri miklu umferð, sem þar er á milli. Hv. flm. var líka að gera aths. við útreikning vegamálastjóra. Ég vil ekki blanda mér inn í það. Ég hygg, að vegamálastjóri hafi látið uppi þessar áætlanir af mjög vel yfirveguðu máli, og verð ég því að treysta þeim talsvert.
Hv. flm. benti á það, að ef nýr vegur yrði lagður á þessum fyrirhugaða stað, þá mundi hann hafa það í för með sér, að ræktun ykist meira meðfram veginum en annars mundi verða. Það má vel vera, að svo verði, þó ég efist um það. Ég býst við, að hvort sem lagður er nýr vegur eða ekki, muni ræktun aukast út frá Reykjavík. En ef þessi vegur er gerður með hliðsjón af hinni miklu umferð, sem nú er milli Hafnarfjarðar og Reykjavíkur, þá er hann of dýr ræktunarvegur. Ég hefi kort af þessu svæði og mér sýnist, að afleggjarinn út frá aðalveginum, sem mundi nægja sem ræktunarvegur, muni vera svo margfalt ódýrari en þessi vegur. Það, sem mér virðist, að menn hljóti fyrst og fremst að veita eftirtekt, er það, að nýr vandaður vegur getur orðið upp undir 1/4 millj. kr. dýrari en samskonar umbætur á gamla veginum milli Hafnarfjarðar og Reykjavíkur, og vegalengdin þar á milli, sem n. álítur, að hljóti að vera aðalatriðið í sambandi við þennan veg, verður 1/4 lengri eftir nýja veginum en eftir þeirri leið, sem er.
Hv. flm. benti á það, að vegarsæði eins og það er nú væri frá náttúrunnar hendi þannig, að það gæti ekki orðið eins góður vegur þar eins og á nýju leiðinni. Það má vera, ég er ekki svo kunnugur, að ég geti dæmt um það. Ég býst við, að mishæðóttara sé á gamla veginum, en eins og kunnugt er, eru bifreiðar alltaf að verða betur og betur útbúnar, ekki sízt að því leyti, að þær sakar nú mun minna en áður, þó um dálítinn halla sé að ræða. Og það mætti vera meiri munurinn á vegarstæðunum, ef sá mismunur gæti vegið upp á mót mismun vegalengdanna. Annars geri ég ráð fyrir, að það þýði ekki mikið fyrir okkur hv. þm. Hafnf. að ræða um þetta, því ég býst við, að það, sem hv. þm. fyrst og fremst taka til greina, séu upplýsingar, sem vegamálastjóri hefir gefið í þessu efni, og svo þeirra persónulegu skoðanir á málinu. Hv. 2. landsk. var að átelja n. fyrir það, að hún ekki einasta legði til, að frv. yrði fellt, heldur gerði hún ekkert til þess að bæta úr þeirri þörf, sem nú væri á að bæta veginn milli Hafnarfjarðar og Reykjavíkur, það er ekki rétt, að n. hafi alveg leitt það atriði hjá sér, því í nál. er gert ráð fyrir, að umbætur verði gerðar smátt og smátt, eftir því sem umferðin og aðrar ástæður. Krefja, og svo verði að lokum gerðar höfuðumbætur á veginum, þegar umferðin er orðin svo mikil, að hún réttlæti það, að sett verði varanlegt slitlag, malbikun eða steinsteypa, eftir því sem þá þykir við eiga. Það er lítið svo á erlendis, að það þurfi a. m. k. 500 bifreiðarferðir á dag til þess að gera það forsvaranlegt fjárhagslega að setja varanlegt slitlag á vegi. Nú greinir menn á, hver muni vera umferðin á þessari leið eins og stendur, en þó maður gangi til frá því, að umferðin sé upp undir 400 bílar á dag, þá er engin vissa fyrir því, að hún muni hraðvaxa, en hún má vaxa allmikið enn til þess, að það verði talið skynsamlegt að byrja á því að setja þarna varanlegt slitlag. Það er langt frá því, að þetta sé fjölfarnasta leið landsins; vegurinn austur er miklu fjölfarnari, og eins og kunnugt er, er ekki ennþá komið á hann varanlegt slitlag.