02.05.1933
Efri deild: 61. fundur, 46. löggjafarþing.
Sjá dálk 1857 í B-deild Alþingistíðinda. (2653)
80. mál, dýralæknar
Atvm.rh. (Þorsteinn Briem):
Ég heyrði því miður ekki alla ræðu hv. þm. Snæf., en hjó þó eftir því, að hann taldi, að hægt myndi vera að finna nýjar leiðir til að bæta úr dýralæknisleysinu, nefnil. með námskeiðum. Skal ég ekki hafa mörg orð um það, en mun athuga það efni nánar. Hv. þm. talaði einnig um, að hann teldi miður farið, að breyting hefði orðið á setri dýralæknisins í Vestfirðingafjórðungi 1928, þegar honum var gert að skyldu að sitja í Borgarnesi, en ekki í Stykkishólmi, eins og áður hafði verið. Ég hygg, að þeirri breyt. hafi sérstaklega valdið það, að heppilegt hafi þátt, vegna bændaefna landsins, sem stunda nám á Hvanneyri, að dýralæknirinn væri einmitt búsettur þar í grennd, til þess að geta veitt bændaefnunum, sem búnaðarskólann sækja, fræðslu í sinni grein. Um þál. frá 1929, sem hv. þm. hafði þá flutt hér í d., er mér ekki kunnugt, hvort hún var samþ. í báðum d. Ég hygg, að sú stj., sem þá sat að völdum, hafi tekið þá þál. til athugunar, og hið sama get ég talið mér skylt að gera, ef ég á sæti í stj. framvegis. En ég hygg, að ýmsar fleiri ástæður hafi verið til þess, að heppilegt þótti að flytja dýralæknissetrið úr Stykkishólmi í Borgarnes. Þótt landbúskapur sé allmikill á Snæfellsnesi og í kringum Breiðafjörð, þá er Borgarfjörðurinn ekki síður stórt og mikið landbúnaðarhérað. Og í Mýra- og Borgarfjarðarhéraði er mikið mjólkurbú, og þykir brýn þörf á eftirliti með heilbrigði nautgripa á því svæði, sem framleiðir mjólk til vinnslu þar. Ef hnigið yrði að því ráði, sem hv. þm. talaði um í sinni ræðu, að bæta úr dýralæknisleysinu með námsskeiðum, þá hygg ég, að vart myndi nokkur staður heppilegri til slíkra námskeiða en búnaðarskólinn á Hvanneyri, og bætist við ein ástæðan enn til að hafa dýralækninn búsettan þar nálægt. En viðvíkjandi námskeiðum yfirleitt vil ég geyma mér að ræða um þau til 3. umr.