18.12.1934
Neðri deild: 63. fundur, 48. löggjafarþing.
Sjá dálk 1660 í B-deild Alþingistíðinda. (1727)
31. mál, sala mjólkur og rjóma
Pétur Halldórsson [óyfirl.]:
Þetta, sem hv. þm. Snæf. drap á, er stórt atriði, og ég vil í tilefni af orðum hv. þm. Snæf. spyrja hv. þm. Mýr. að því, hvort þetta atriði fái ekki í raun og veru alveg nýjan svip við það, að verðjöfnunargjaldið eða hámark þess verður fastákveðið með lögum. Tilgangur laganna er sá, að jafna svo á milli þeirra, sem búa nær og fjær Rvík, með verðjöfnunargjaldinu, að báðir megi vel við una, bændur austan fjalls fái hærra verð fyrir mjólk sína, en framleiðendur í og kringum Rvík fái að sitja einir að markaðinum þar. Þetta má ef til vill takast, en þó því aðeins að verðjöfnunargjaldið sé ekki ákveðið fyrirfram. Það er tilgangur laganna, að verðjöfnunargjaldið skapi þann jöfnuð, sem nauðsynlegur er til þess, að þeir, sem fjær eru, sendi ekki mjólk sína á Rvíkurmarkaðinn, því að þeim er hvergi í l. bannað að senda mjólk sína hingað til sölu. Ef verðjöfnunargjaldið, eins og það er ákveðið í l., hrekkur ekki til að skapa þennan jöfnuð, hvernig fer þá? Hver á að fella úrskurð, ef framleiðendur þeir, sem fjær búa Rvík, vilja eftir sem áður senda mjólk sína á Rvíkurmarkaðinn? Mér virðist spurningin óleyst, sérstaklega ef hámark verðjöfnunargjalds er lögákveðið.