22.11.1935
Efri deild: 76. fundur, 49. löggjafarþing.
Sjá dálk 2282 í B-deild Alþingistíðinda. (3265)
154. mál, verslun með kartöflur og aðra garðávexti
Frsm. (Bernharð Stefánsson):
Eins og getið er um í nál. landbn. á þskj. 571, sá n. ekki ástæðu til að afgr. nema annað þeirra frumv., sem vísað var til hennar um þetta efni. Og hefir n. afgr. það frv., sem hér liggur fyrir á þskj. 440. N. flytur fjórar brtt. við frv., á þskj. 571. Fyrsta brtt. er við 4. gr., en sú gr. fjallar um það, að banna megi innflutning á kartöflum og öðrum garðávöxtum. N. þykir óþarft að banna sérstaklega innflutning á þeim garðávöxtum, sem grænmetisverzlun ríkisins kemur til með að hafa einkasölu á; því að vitanlega hefir hún það í hendi sinni að takmarka innflutninginn eftir vild og fella hann niður með öllu vissa tíma. Er því samkv. 1. brtt. bannaður innflutningur á þeim grænmetisvörum, sem framleiddar eru í landinu og grænmetisverzlun ríkisins annast ekki innflutning á.
Þá er 2. brtt. n. við 5. gr. Þar er lagt til, að grænmetisverzlunin geti einnig selt vörur til bæjar- og sveitarfélaga eins og til kaupmanna og kaupfélaga. Það getur vel farið svo, að bæjar- og sveitarfélög vilji gjarnan kaupa vörur beint frá grænmetisverzluninni, og sér n. ekkert á móti því, að það sé leyft.
3. brtt. n. er við ákvæði til brábabirgða. Samkv. frv. eru heimilaðar 60 þús. kr. á næstu þremur árum til þess að veita verðlaun fyrir aukna kartöfluframleiðslu. N. þykir rétt að takmarka, hversu miklu skuli varið á hverju ári fyrir sig til verðlauna, m. a. vegna þess, að réttara er að tiltaka þá fjárhæð í fjárl. N. hefir reynt að skipta þessu niður á árin, eftir því sem hún taldi líkur til, að kostnaðurinn mundi verða hvert árið fyrir sig, miðað við þar reglur, sem í frv. eru um það. Vitanlega verður hann mestur fyrsta árið, en svo dregur smámsaman úr því. Hvort n. hefir hitt nákvæmlega rétt á um þetta, er ekki gott að fullyrða neitt um, en varla mun það fara mjög fjarri lagi. 4. brtt. n. þarf engra skýringa við.
N. hefir verið einhuga um þessar brtt. og stendur öll að þeim. En hinsvegar er það kunnugt, að hv. 4. landsk. óskar eftir frekari breyt. á frv. og vill sennilega koma því í sama horf og það frv. var, sem hann flutti hér í d. Hv. 2. þm. Rang. skrifaði undir nál. með fyrirvara, og geri ég ráð fyrir, að hann geri grein fyrir honum.