15.11.1935
Neðri deild: 74. fundur, 49. löggjafarþing.
Sjá dálk 625 í C-deild Alþingistíðinda. (4198)
161. mál, sláturfjárafurðir
Gísli Guðmundsson:
Það er leiðinlegt, að þessi fáu orð, sem ég sagði, hafa orðið til að hleypa upp í hv. 6. þm. Reykv., því að það er ekki vel gert að ergja hans stirðu lund, og var ekki ásetningur minn.
Ég vík þá að hv. þm. Borgf. Hann svaraði fyrirspurn minni, - að vísu fremur ógreinilega, en þó þannig, að ég verð að telja, að nægi. því að hann gaf yfirlýsingu um það - og geri hann aths., ef ég hefi ekki rétt eftir honum -, að kjötsölulögin hafi hjálpað bændum til að fá viðunandi verð fyrir kjötið. Þá er þar með fallið, eins og hver önnur vitleysa, það, sem hv. 6. þm. Reykv. sagði nú (eins og oftar), að það hafi verið tekinn einhver réttur af bændum til þess að ákveða nógu hátt verð. Ég ætlaði mér að láta hv. þm. Borgf. kveða niður vitnisburð hv. 6. þm. Reykv.; og það hefir hann nú gert.
Það er vitanlega alveg rétt hjá hv. þm. Borgf., að þegar komið er fram yfir sláturtíð, er hægt að fá öruggar skýrslur um það, hve miklu slátrað er á hverjum stað og hve mikið kemur af kjöti á markaðinn. En það er ekki hægt að vita fyrirfram, hver neyzlan verður, en það er það, sem er aðalatriðið í þessu máli og gerir það að verkum, að kjötverðlagsn. verður fyrirfram að áætla um, hve mikið kjöt muni þurfa til að fullnægja eftirspurninni.
Fleira þarf ég ekki að segja við hv. þm. Borgf. Ég ætlaði að bæta nokkrum orðum við til hv. 6. þm. Reykv. En ég sé, að hann er farinn út, svo að ég lofa honum að hvíla í friði.