01.04.1935
Sameinað þing: 7. fundur, 49. löggjafarþing.
Sjá dálk 28 í D-deild Alþingistíðinda. (4712)
112. mál, verðuppbót á útflutt kjöt
Fjmrh. (Eysteinn Jónsson) [óyfirl.]:
Minni hl. fjvn. hefir flutt brtt. um það, að í staðinn fyrir 10% niðurfellingu á framlagi til akvega verði felld niður prentun á umræðuparti Alþt. Ég vil taka það fram nú þegar, að afstaða mín til þessarar till. fer nokkuð eftir því, hverra afdrifa má vænta fyrir till. á þskj. 334, sem fer fram á, að prentun á umræðuparti þingtíðindanna verði látin falla niður og sú upphæð, sem þar við sparast, sé látin ganga til að bæta skaða af ofviðri. Ef búast mætti við, að sú till. yrði samþ., þá væri bein afleiðing þess sú, að ég yrði á móti till. á þskj. 338, sem fer fram á, að prentun umræðupartsins verði felld niður til þess að mæta kostnaðinum við kjötuppbótina. Ef hinsvegar er útlit fyrir, að till. á þskj. 334 nái ekki fram að ganga, þá mun ég skoða huga minn um það, hvort ég gangi að þessari till. hv. minni hl. fjvn. Þess vegna vildi ég, að flm. till. á þskj. 338 lýstu því yfir, hver afstaða þeirra væri til till. á þskj. 334. ef þeirra till. væri felld.
Hv. l. þm. Skagf. minntist á í sambandi við niðurfærslu á útgjaldaliðum fjárl., að ríkisstj. hefði komið fram sparnaði með því að leggja kostnaðinn við stjórn afurðasölunnar á framleiðendurna. Ég vil taka það fram, að langmestur hluti af þeim kostnaði er ekki í fjárl. Aðeins 20 þús. krónur af því er miðað við fjárlög. Það er því enginn verulegur sparnaður og ekkert hægt að treysta á þá upphæð í þessu sambandi.
Ég hefði sem sagt viljað heyra frá flm. till. á þskj. 338, hver afstaða þeirra væri til till. á þskj. 334, og hvort Sjálfstfl. mundi geta fylgt þeirri till., og ef ekki allur flokkurinn, þá hve mikill hluti flokksins mundi geta fylgt henni.
Þetta er kannske til nokkuð mikils mælzt, en er þó nauðsynlegt að vita, ef taka á afstöðu til þessa máls.
Þá talaði hv. þm. V.-Húnv. fyrir sinni tillögu, og ég skal strax taka það fram, að ég er á móti þessari till., og ég skal skýra það fyrir hv. þm., hvers vegna ég er á móti henni. Ég veit hann skilur það, þó aumur sé, að það er vegna þess, að á síðasta Alþ. fóru fram samningar á milli stjórnarflokkanna, og var þá myndaður grundvöllur fyrir því, hversu mikið fé skyldi veitt til kaupstaða og hve mikið til sveitanna. Það er því ljóst, að ef klipið er af því fé, sem ætlað var verkamönnum í kaupstöðum, þá er það ekkert annað en svik. Okkur framsóknarmönnum mundi hafa þótt það harðar búsifjar, ef jafnaðarmenn hefðu gengið inn á það með sjálfstæðismönnum að klípa af lið, sem bændum hefði verið ætlaður, og taka það í þarfir verkamanna í kaupstöðunum. Af þessari ástæðu er það óhugsandi, að Framsfl. geti hallazt að þessari till., því það væri ekkert annað en svik á samkomulagsatriðum milli stjórnarflokkanna og kemur því ekki til mála. Hv. þm. V.-Húnv. er ekki of gott að flytja svona till. og hafa hana svo á þingmálafundum til þess að segja bændum, að þessir ónýtu framsóknarmenn hafi eingöngu viljað taka af þeim lið, sem bændunum var ætlaður. Þessi till. hans er sprottin af þessum alþekkta naglaskap, sem kemur fram í öllum hans till., en þær eru miðaðar við það að fá aðstöðu til að vekja tortryggni á Framsfl. og fara í þá átt, að tekið sé fé frá verkamönnum og varið í þarfir bænda og að úthlutað sé peningum til bænda án þess að gerð sé grein fyrir því, hvar eða hvernig eigi að fá þessa peninga. Hv. þm. getur gert það að gamni sínu að flytja þessar till. og hampa þeim svo á þingmálafundum, en það er ekkert tillit tekið til þeirra af Framsfl. við erum upp úr því vaxnir að taka tillit til þess naglaskapar, sem kemur fram hjá hv. þm. V.-Húnv.
Ég hefi svo ekki miklu við þetta að bæta. Það stendur á sama, hvernig um þetta er rætt fram og aftur. Það stendur fast. vegna þeirra samninga, sem gerðir hafa verið við Alþfl., að það kemur ekki til mála að gera þær ráðstafanir, sem hv. þm. V.-Húnv. gerir ráð fyrir. Auk þess vil ég benda á, að sú upphæð, sem ganga á til kjötuppbótar, er ekki að öllu leyti tekin þannig, að það verði frádráttur á fjárframlagi til bænda árið 1935. Í því sambandi má geta þess, að frestunin á greiðslu á hluta af útflutningsgjaldi til ræktunarsjóðs verður ekki til þess, að sjóðurinn þurfi að minnka starfsemi sína, því það munu verða gerðar ráðstafanir til þess, að sjóðurinn geti haldið áfram starfsemi sinni eins og áður.