18.04.1936
Efri deild: 51. fundur, 50. löggjafarþing.
Sjá dálk 889 í B-deild Alþingistíðinda. (1381)
110. mál, tekjuöflun fyrir ríkissjóð
*Frsm. (Bernharð Stefánsson):
Eins og getið er í grg. frv., þá er það flutt af meiri hl. fjhn. samkv. heiðni hæstv. fjmrh. Fer frv. fram á að framlengja til ársloka 1937 þá tekjustofna, sem ríkissjóður hefir samkv. lögum á þessu ári og ekki er þegar búið að leita framlengingar á í öðrum frv. Ég get nú ekki skilið, að það hafi komið neinum á óvart, að þetta frv. væri fram borið. Menn hafa getað séð það strax, þegar fjárlfrv. var lagt fyrir Alþingi, að það mundi vera ætlun ríkisstj. að leita framlengingar á þeim tekjustofnum, sem þetta frv. fjallar um, því í tekjuáætlun fjárl. eru einmitt teknir upp allir þessir tekjustofnar, og eins og menn vita, þá hafa fjárl. verið samþ. til 3. umr. í Sþ. með þessum tekjustofnum. Eins og menn vita, þá var niðurstaða fjárl. eftir 2. umr. sú, að það mundi vera um 400 þús. kr. tekjuhalli samkv. áætlun þeirra. Nú hefir það komið til orða, sérstaklega af hendi stjórnarandstæðinga, að áætlun sumra eldri tekjustofna mundi mega hækka alllverulega, og ég skal játa, að ég býst við, að óhætt muni vera að hækka þessa liði eitthvað, eða nálægt því, sem tekjuhalla fjárl. nú nemur, þannig að fjárl. ættu samkv. því að geta orðið tekjuhallalaus, en þó því aðeins, að þeim tekjustofnum sé haldið, sem verið hafa.
Það hefir nú komið frum, bæði í fjvn. og eins við 2. umr. fjárh., að það mun alls ekki vera ágreiningur um öll atriði þessa frv., heldur mun ágreiningurinn aðeins vera um þau atriði frv., sem standa í lögum þeim frá í fyrra, sem í daglegu tali eru kölluð „klauflax“. Eftir fjárlfrv. eru tekjurnar samkv. þeim lögum áætlaðar af hátekjuskatti 200 þús. kr., og af gjaldi af innfluttum vörum 750 þús. kr. Er þetta samtals 950 þús. kr., eða tæp milljón. Meiri hl. fjhn. lítur nú svo á, að þessi upphæð, sem hér er um að ræða og ágreiningur er um, megi alls ekki missast, ef tryggilega á að vera gengið frá fjárhagsáætlun ríkisins fyrir árið 1937. Ef fella ætti niður þessa tæpu milljón kr., þá virðist sem það þyrfti jafnframt að finna sparnað, sem næmi a. m. k. jafnhárri upphæð, en það hafa nú ekki komið fram neinar slíkar sparnaðartill. ennþá. Þvert á móti voru þær till., sem fram komu við 2. umr. fjárl., allar til hækkunar, en ekki til lækkunar. En ef fram kæmu skynsamlegar sparnaðartill. um eina millj. kr., þá mætti e. t. v. láta þetta frv. falla niður.
Fjhn. mun að sjálfsögðu telja sér skylt að athuga þetta frv. nánar, en þar sem það er flutt af meiri hl. hennar, þá sé ég ekki ástæðu til að leggja til, að því verði sérstaklega til hennar vísað.