14.04.1936
Neðri deild: 48. fundur, 50. löggjafarþing.
Sjá dálk 430 í C-deild Alþingistíðinda. (2729)
98. mál, vátryggingarfélög fyrir vélbáta
*Pétur Ottesen:
Það var fyrir tilmæli frá mér, að umr. um þetta mál var frestað fyrir páskana. Ég hreyfði þá þeirri gagnrýni gegn frv. þessu, að það væru ekki aðeins ýms fyrirkomulagasatriði í frv., sem mér þóttu óaðgengileg fyrir vélbátaeigendur, heldur væru kjör þau, sem þeim væru ætluð hér, mun verri en þeir eiga nú við að búa hjá vátryggingarfélögunum, og byggi ég þá staðhæfingu mína um þetta á þeim kynnum, sem ég hefi af vátryggingu vélbátanna á Akranesi. Virðist mér því frá þessu sjónarmiði séð, að ástæða sé til að gera ennþá breyt. á frv. þessu; en þrátt fyrir bezta vilja, þá hefir mér samt ekki unnizt tími til að útbúa þær brtt., sem nauðsynlegar verða að teljast. Það, sem ég sérstaklega hafði við frv. að athuga, var það, að hvergi er hægt að ráða í það, hvorki í frv. sjálfu eða í grg. þess, hver myndu verða iðgjöld þeirra manna, sem kæmu til með að skipta við hið nýja vátryggingarfélag, en það myndu verða allir vélbátaeigendur, sem ráð hefðu yfir vélbátum upp að 70 tonn, stærð. Mér virðist þetta mikill ágalli, að ekki skuli hafa verið gert yfirlit yfir flotann og reynt að komast að ábyggilegri niðurstöðu með því að skipta vátryggingu hans niður í áhættuflokka, og áætla svo út frá því, hvaða vátryggingargjöld ætti að greiða til þess að fyrirtækið væri fjárhagslega tryggt. Að þetta skuli ekki hafa verið gert, verður að teljast mikill galli, því að ég veit, að þeir vélbátaeigendur, sem ég hefi talað við a. m. k., eru mjög ófúsir til að ganga undir nýja löggjöf um þessa hluti án þess að vita fyrirfram, hver áhrif breyt. hefir á viðskiptakjörin. Það verður því að teljast æskilegt, áður en lögboðin verður skyldutrygging vélbáta, að fram verði látin fara svo nákvæm athugun á þessu sem hægt er, og það ætti alls ekki að vera frágangssök að gera svo nákvæma athugun á þessum hlutum, að á henni mætti byggja.
Við nákvæma athugun þessa máls hefi ég því komizt að þeirri niðurstöðu, og hefi þar á bak við mig vilja þeirra vélbátaútvegsmanna, sem ég hefi náð tali af, að ekki sé gerlegt að setja skyldutryggingu á vélbáta fyrri en fyrir liggi ábyggilegir útreikningar um þau kjör, sem hin nýja stofnun hefði að bjóða upp á, og það því frekar, þar sem ekki er kunnugt, að fyrir liggi neinar almennar óskir eða samþykktir frá vélbátaeigendum um skyldutryggingu. Með hliðsjón af því sem ég nú hefi tekið fram, hefi ég tekið þá ákvörðun að leggja til, að máli þessu verði frestað nú að þessu sinni og það afgr. með svo hljóðandi rökst. dagskrá:
Þar sem ekki liggja fyrir neinar almennar óskir eða samþykktir vélbátaeigenda í landinu um að koma á skyldutryggingu á vélbátum, og hinsvegar ekki fyrir hendi nein gögn um, hverra iðgjalda verður krafizt í hinni nýju tryggingu, þá telur deildin málið ekki nægilega undirbúið og tekur því fyrir næsta mál á dagskrá.