11.05.1938
Sameinað þing: 30. fundur, 53. löggjafarþing.
Sjá dálk 199 í D-deild Alþingistíðinda. (2941)
130. mál, fullveldisminning
*Guðrún Lárusdóttir:
Herra forseti! Það er vilji okkar allra, að þau hátíðahöld, sem nú eru ráðgerð, fari fram sem virðulegast og fegurst. Nú eru horfur á, að þessu máli verði vísað til ríkisstj., og vildi ég þá beina þeim tilmælum til hennar, að hún, þegar hún fer að vinna að þessu, taki til athugunar atriði, sem ég tel miklu varða, að á hátíðisdeginum verði lokað þeim eiturbrunni, sem kemur í veg fyrir allan virðulegan og hátíðlegan blæ. Þetta er mín uppástunga í málinu, og ég vil í þessu sambandi minna á það, að á 1000 ára hátíðinni á Þingvelli hefði orðið annar bragur á framferði þeirra þúsunda, sem þar voru saman komnar, ef ekki hefði verið gripið til þess góða ráðs að loka áfengisverzluninni í tæka tíð.