25.04.1938
Efri deild: 53. fundur, 53. löggjafarþing.
Sjá dálk 549 í B-deild Alþingistíðinda. (657)
25. mál, húsmæðrafræðsla í sveitum
Guðrún Lárusdóttir:
Það er aðeins út af því, sem hv. frsm. sagði um brtt. mínar. Hann kom einmitt sjálfur með sönnun fyrir réttmæti þessarar brtt., þar sem hann var að tala um mismun á kaupi karla og kvenna. Annars get ég í sambandi við brtt. mína tekið það fram, að ég vildi gjarnan sýna þá tilhliðrunarsemi að taka brtt. mína aftur til 3. umr. og fá hana rædda nánar í n. En viðvíkjandi síðari brtt., þá verður það sjálfsagt alltaf álitamál, sem tæplega verður útkljáð á einum þingfundi, hvar slíkur skóli eigi að standa. Ég held því fram, að það væri heppilegri staður fyrir hann hér í Reykjavík heldur en upp í sveit. Það má t. d. benda á, að ef skólinn yrði upp í sveit, þá legðist ekki lítill kostnaður á allt það, sem flytja þyrfti til skólans, og það er hreint ekki svo lítið, sem flytja þarf til slíks skóla. Þetta er kannske ekkert atriði, en það er annað, sem ég álít vera til stuðnings því, að skólinn verði hafður í Reykjavík, og það eru þau skilyrði, sem hér eru fyrir hendi. Á ég þar við ýmsar stofnanir, eins og t. d. rannsóknarstofu háskólans o. m. fl. Ég geri ráð fyrir, að í þessum skóla yrði kennd efnafræði, og væri þá mjög þægilegt að vera í námunda við slíka rannsóknarstofu, svo að eitt dæmi sé tekið.