04.06.1941
Efri deild: 71. fundur, 56. löggjafarþing.
Sjá dálk 472 í B-deild Alþingistíðinda. (962)
134. mál, eyðing svartbaks
Þorsteinn Þorsteinsson:
Það var aðallega út af fyrirspurn hv. 2. landsk. til hæstv. forsrh. og mín, sem ég vildi standa upp. Annars er þetta mál farið að verða nokkuð rætt og þarf ekki að lengja umr. um það.
Ég get tekið það fram, sem lýst var yfir í framsögu um það, hvernig l. frá 1936 urðu til, að ég játa, að fyrst, þegar ég flutti þetta mál, þá hafði ég ákvæðið um eitrun í því, en þegar ég sá andúðina, sem það mætti, og þegar Dýraverndunarfélagið reis öndvert gegn því, þá sá ég, að það mundi réttara að hafa sama ástand og geta ekkert um það í l., að heimilt væri að eitra, því það var þyrnir í augum sumra hv. þm. En það var vitanlega þá, eins og nú, heimild til þess að eitra fyrir vargfugl og önnur dýr. Það mun að vísu enginn lagabókstafur vera fyrir þessu, en það mun vera auglýsing frá landlækni frá því 1913 til apóteka, sem staðfestir þetta, þar sem apótekum er heimilað að láta af hendi eitur til þess að eitra fyrir dýr og fugla og önnur kvikindi, sem eru skaðleg.
Það þarf að fá vottorð sýslumanns eða hreppstjóra um, að gætilega verði farið með eitrið. Einnig hefur það um langan tíma verið boðið í reglugerðum um eyðingu refa að eitra fyrir þá úti um beitilönd og afrétti, a. m. k. fram um 1930. En ég verð að segja það, að mér sárnar við þetta svokallaða Dýraverndunarfélag, hvernig það hefur hagað sér í þessu máli. Það er eins og það loki alveg augunum fyrir því, hvernig vargfuglinn fer með nytjaskepnurnar. Þær virðast engan rétt eiga á sér til varnar, þó að ungar séu gleyptir daglega í tugatali og ráðizt sé á lömb. Það er talað um, að mannúðlegasta aðferðin sé að drepa svartbakinn með skotum. Nú er þetta alls ekki rétt, nema ef svo vel tekst til, að heppnist að helskjóta fuglinn. Annars er þetta alls ekki mannúðleg aðferð. N. vill samt hafa hana, en hún vill ekki, að leyfð sé sú aðferð, sem raunverulega er kvalaminnst að mörgu leyti.
Annars er það hart að setja bann við eitrun, þar sem svo mikið er í húfi fyrir dýrmæta framleiðslu sem hér er.
Það getur vel verið, að einhverjir gallar séu á þessu frv., en þrátt fyrir það má það ekki koma fyrir, að frv. sé fellt.