15.04.1942
Efri deild: 33. fundur, 59. löggjafarþing.
Sjá dálk 665 í B-deild Alþingistíðinda. (1847)
18. mál, stimpilgjald
Páll Zóphóníasson:
Herra forseti ! Mig langar til að fá upplýsingar frá þeim manni, sem stendur að þessu frv., og einnig frá flm. brtt. Ég skil það vel, að fyrir hv. flm. frv. vakir það, að innheimtumaður gjaldsins reyni að komast fyrir hið raunverulega kaupverð og innheimti svo stimpilgjaldið af því. En það eru dálítið farnar að fara í vöxt vissar tegundir fasteignasölu, þar sem mér er ekki ljóst, hvað á að kalla kaupverð ið og hvernig á að borga stimpilgjald af þeim, hvorki eftir frv. né brtt. Það er ekki orðið ótítt, að félög eigi fasteignir. Og það er ekki heldur ótítt, að fasteignin er seld þannig, að allt hlutaféð er selt, en fasteignin er ekki formlega seld. Það er t.d. félag, sem á 100 þús. kr. í hlutafé, og svo selur það fyrir 600 þús. kr. hlutabréfin, en það er aldrei talað um, að fasteignin sé seld. Hvert er söluverð fasteignarinnar, sem þarna er um að ræða? Það er talað um, að fasteignir hafi svona lagað verið seldar fyrir meira en hundraðfalt verð, líklega nær hundrað og tvítugfalt verð, þegar miðað er við kostnað eða nafnverð hlutabréfanna. Mér er ekki kunnugt um, hvaða stimpilgjald hefur verið borgað af slíkri sölu. En þarna stendur fasteignin á bak við hlutabréfin. — Mig langar til að vita, hvort frv. eða brtt., hvort um sig, nær til þess konar sölu, sem er nú nýbyrjuð, en fer ört í vöxt.