12.04.1943
Sameinað þing: 41. fundur, 61. löggjafarþing.
Sjá dálk 153 í D-deild Alþingistíðinda. (3723)
157. mál, strandferðabátur fyrir Austurland
Gísli Jónsson:
Ég vildi bara benda hv. þm. á, að með því að samþ. brtt. hv. fjvn. á þskj. 677, þá er einmitt haldið sér algerlega við málið eins og forstjóri Skipaútgerðar ríkisins raunverulega hefur lagt til, bæði við samningagerð og í skjali sínu að nokkru leyti. Því að hann tekur hér fram:
„Er ekki sjáanlegt, að hægt verði að koma því í framkvæmd eins og sakir standa,“ og á þar við, að byggður verði 100 smálesta bátur, sem sérstaklega væri ætlaður til að ganga á milli hafna á Austurlandi. „Hins vegar skal það viðurkennt, að Austfirðingar eru illa settir, að því er samgöngur snertir, og er nauðsynlegt að gera allt, sem hægt er, til að bæta úr þeim hið bráðasta.“
Það er vitanlegt, að þó að byrjað væri á því í dag að byggja svona bát, mundi það taka a. m. k. 2–3 ár að fá því lokið, m.a. vegna þess, að erfitt er að fá vélar í slíka báta. Og á þeim tíma gæti margt breytzt, svo að það gæti kannske orðið enginn gróði fyrir Austurland að koma málinu í það horf, sem hv. 6. landsk. og hv. 2. þm. N.-M. vilja. Ég legg því til, að samþ. verði brtt. fjvn. á þskj. 677. Hún gerir ekkert upp á milli landsfjórðunganna. Með henni fær málið góðan undirbúning. Og hvort bátur er byggður fyrir einn fjórðung eða annan, það er ekkert aðalatriði. Því að þeir, sem með þessi mál fara, mundu byggja fyrsta bátinn fyrir þann landsfjórðunginn, sem helzt þyrfti að nota hann. Hins vegar hefur komið fram í þessu nokkur heimapólitík af hálfu hv. 6. landsk. þm. (LJós) og hv. 2. þm. S.-JI. (EystJ), sem berjast fyrir hagsmunamálum kjósenda sinna, eins og eðlilegt er. En það hefur ekkert komið fram, sem bendir til þess, að ekki sé rétt að samþ. brtt. hv. fjvn., til þess að málið sé afgr. viturlega frá hæstv. Alþ.