07.04.1949
Efri deild: 83. fundur, 68. löggjafarþing.
Sjá dálk 565 í B-deild Alþingistíðinda. (922)
158. mál, ríkisreikningar 1945
Fjmrh. (Jóhann Jósefsson):
Herra forseti. Mig langar til að bæta nokkrum orðum við það, sem ég sagði við 2. umr., viðvíkjandi þeim drætti, sem orðið hefur á útkomu ríkisreikninganna. Ég hef athugað síðan, á hverju stendur aðallega, og þær upplýsingar, sem ég hef fengið, eru þær, að venjulega er það svo, að reikningarnir eru tilbúnir í sept. árið eftir. Endurskoðendur þingsins geta því byrjað strax og þingi er lokið, því þótt handritið sé ekki tilbúið, þá liggja frammi öll fylgiskjöl, sem hefur verið raðað af ríkisbókhaldinu og eru því mjög aðgengileg. Ef þetta væri gert og ekki stæði á prentuninni, þá mætti leggja reikningana fyrir árið eftir. T.d. mætti þá leggja reikningana fyrir árið 1948 fyrir þingið um áramótin 1949–50. Það hefur ekki staðið á reikningunum, heldur á endurskoðendum þingsins og prentuninni. Reikningar fyrir árið 1946 voru tilbúnir árið 1947, en athugasemdir endurskoðenda Alþingis hafa ekki enn þá borizt ráðuneytinu. Reikningar fyrir árið 1947 voru tilbúnir í handriti snemma hausts 1948 og afhentir Gutenberg, en þó mun enn langt í land með prentun þeirra, og þar sem endurskoðendur Alþingis hafa ekki enn þá lokið við reikningana fyrir 1946, þá hafa þeir sjálfsagt ekki litið á reikningana fyrir 1947. Prentsmiðjan hefur borið fyrir sig mikið annríki og þá fyrst og fremst fyrir Alþingi, en þingskjöl Alþingis ganga fyrir allri prentun yfir þingtímann. Það hefur verið venja að leita ekki til annarra prentsmiðja, en auðvitað mætti gera það, og er í rauninni full ástæða til að reyna að fá reikningana prentaða annars staðar.
Þetta er það, sem ég vildi segja um dráttinn á reikningunum, og vil endurtaka það, að ef endurskoðendur Alþingis vilja, þá geta þeir hafið endurskoðunina strax og þingi lýkur. Ég vildi geta þessa af því, að mér fannst á þingmönnum um daginn, að þeir álitu þetta vera fyrir trassaskap í ráðuneytinu, en svo er ekki, enda gengur endurskoðun ríkisins jafnt og þétt, og stendur ekkert á henni. Hins vegar geri ég ráð fyrir, að ekki þyki tilhlýðilegt að leggja ríkisreikningana fyrir Alþingi án endurskoðunar Alþingis og svara ráðherra. Það er því Alþingi, sem verður að ýta á eftir endurskoðendum sínum, ef það vill fá reikningana fyrr en hefur verið.