23.10.1951
Efri deild: 19. fundur, 71. löggjafarþing.
Sjá dálk 338 í C-deild Alþingistíðinda. (2922)
62. mál, ítök
Gísli Jónsson:
Herra forseti. Ég þakka hv. n. fyrir það, að hún skyldi taka til greina ábendingu mína við 5. gr. En ég vil segja, að mér finnst þessi breyt. langt frá því að vera nógu skýr. Eins og ég benti á, er 5. gr. frv. ekki nægilega skýrt orðuð, en ég skal ekki tefja umr. með löngu máli. — Eins og hæstv. dómsmrh. benti á, þá getur ábúandi fyrirmunað sölu ítaks, ef eigandi vill selja, en ef ábúandi hefur gert samning um jörð, er gengið á rétt hans, ef ábúðartími hans er ekki runninn út. Ég get ekki fellt mig við þetta og mun ég bera fram brtt. við 5. gr. frv., að aftan við 1. málsl. gr. komi nýr málsl., er orðist svo: Ítak má þó aldrei selja nema með samþykki ábúanda, svo lengi sem hann hefur löglegan ábúðarrétt á jörðinni. — Ef umráðamaður selur ítak eða er dæmt að selja, er gengið á rétt ábúanda, nema ákvæði séu þar um í leigumálanum. Ég tel það mikilsvert atriði, hvort hægt sé að breyta leigumála með þessari löggjöf eða ekki. Þótt 5. gr. frv. sé breytt eins og landbn. leggur til, þá eru þar ekki nægilega skýr ákvæði, og vil ég því orða hana öðruvísi. Það er óhæfa í löggjöf, að breytt sé samningum á milli eiganda og ábúanda jarðar, og það er ólíklegt, að leigjandi geti sætt sig við slíkt. Það er ekki ástæða til að flýta umr. um þetta mál. Ég vil biðja hv. landbn. að athuga orðalag gr. nánar á milli umr., en 5. gr. frv. virðist vera betur orðuð í frv. en í brtt. n. Ég set það að skilyrði fyrir fylgi mínu við málið, að ekki verði raskað gerðum samningum á milli aðila.