19.12.1951
Neðri deild: 50. fundur, 71. löggjafarþing.
Sjá dálk 271 í B-deild Alþingistíðinda. (503)
60. mál, dýrtíðarráðstafanir vegna atvinnuveganna
Emil Jónsson:
Herra forseti. Ég skal ekki vera langorður. Það er aðeins tvennt, sem mig langar til að benda á. Hæstv. atvmrh. sagði út af forustuhlutverki Sjálfstfl., að uppistaðan í yfirlýsingu, sem hann hefði gefið í sambandi við efnahagsmálin, væri, að gengið væri frá greiðsluhallalausum fjárlögum. — Ég benti á í minni ræðu áðan, að hv. 7. þm. Reykv. hefði bæði fyrr og nú talið þessa framkvæmd, að bæjarfélögin fengju hluta af söluskattinum, mögulega án þess að afgreiða fjárlög með greiðsluhalla og þannig samrýmanlega þeirri yfirlýsingu, sem ríkisstj. hefði gefið. Þess vegna undrar okkur hina, að skuli hafa verið horfið af þessari braut, vegna þeirrar yfirlýsingar hv. 7. þm. Reykv., að hægt væri að gera þetta innan ramma yfirlýsingar Sjálfstfl.
Hitt atriðið er svo það, að hann lét einnig óheinlínis í ljós, að sjálfsagt þyrfti ég ekki að vænta mikils af þessu fyrir mitt kjördæmi. Það er kannske, — ég vil ekki segja óeðlilegt, — en mér finnst það eftir öðru hjá hæstv. ríkisstj., ef þm. má ekki láta í ljós skoðun sína án þess að vera heitið straffi. Ég þykist hafa málfrelsi hér, en ef það málfrelsi á að kosta það, að mitt kjördæmi verði afskipt, þá fer að verða vandlifað. — Ég spurði hæstv. fjmrh. að, hvernig ætlunin væri að skipta þessu, hvort ætti að gera það í hlutfalli við inneign bæjarsveitarfélaganna. Hann gaf loðin svör og sagði, að enn hefði ekki verið tekin ákvörðun um það. En ef það er eins og hæstv. atvmrh. lét skína i, að það ætti að mismuna mönnum eftir skoðunum, styrkir það þann grun, að ekki eigi að skipta því alveg hlutfallslega rétt, en það kemur í ljós á sínum tíma.