08.12.1955
Neðri deild: 28. fundur, 75. löggjafarþing.
Sjá dálk 1044 í B-deild Alþingistíðinda. (1066)
118. mál, ný orkuver og orkuveitur
Ásgeir Bjarnason:
Herra forseti. Þar sem rafmagnsmálin eru á dagskrá, vil ég beina nokkrum fsp. til hv. fjhn., sem hún mundi ef til vill geta aflað upplýsinga um á milli umræðna.
Það er nú einu sinni þannig, að þeim, sem eru afskiptir í raforkumálum, er ekki nákvæmlega sama, hvort þeir eiga í vændum að fá rafmagn frá samveitum eða ekki, og þá einnig hitt, hvenær þeir mundu eiga kost á að fá rafmagnið. Þau mestu þægindi, sem heimill getur veitt sér, eru rafmagnið og öll sú tækni, sem hægt er að notfæra sér út frá því.
Það var um það rætt á sínum tíma, þegar þessi hæstv. ríkisstj. var mynduð, sem nú situr, að gera tíu ára áætlun í raforkumálum landsins. Síðan eru liðin rúm tvö ár, og væri ekki ólíklegt, að þegar væri búið að gera einhverja áætlun í þessum málum, þannig að hægt væri að gefa hana út, svo að hin einstöku héruð, sem raforkunnar kunna að njóta í framtíðinni, viti nokkurn veginn, hvenær hennar er að vænta. Og ég vil mjög mælast til þess, ef einhver slík áætlun liggur fyrir, að hún yrði gefin út, áður en langir tímar líða, því að hvað sem því líður, hvort rafmagnið kemur á næstunni eða ekki, þá er það á margan hátt skemmtilegra og öruggara fyrir það fólk, sem gerir sér vonir um að fá rafmagn, að vita, hvenær það getur fengið þessi þægindi, því að það er á margan hátt hægt að undirbúa sig undir það.
Ég sé líka, að samkv. þessu frv., sem hér liggur fyrir, er verið að breyta til um orkuver fyrir einstaka staði frá því, sem áður var fyrirhugað, og það er ekki ósennilegt, að þó að það liggi ekki fyrir hér í þessu frv., að um slíkar breytingar sé að ræða viðar, þá geti það verið einnig í vændum, og væri gott að fá upplýsingar um það. Ég fyrir mitt leyti er ekki ánægður með, að það skuli ekkert vera út um það gefið af raforkumálastjórninni, hvenær rafmagns er að vænta í Dalasýslu. Það er ekki vegna þess, að það sé ekki orkuver innan héraðs til þess að virkja, heldur hygg ég, að spurningin sé um hitt, hvort hentara sé að virkja eitthvert vatnsfall innan héraðs eða leiða orkuna til héraðsins. Og einmitt í þessu frv. er talað um að leiða rafmagn eða rafmagnslínu frá Þverá í Steingrímsfirði yfir í Króksfjarðarnes, og ég hef heyrt, að það væri ekki óhugsandi, að rafmagnið yrði tekið frá þeirri linu í Dalasýslu. Mér er mikið kappsmál að vita, hvort svo er eða þá hvaða leiðir yrðu farnar í þeim málum, þegar þar að kæmi, og hvenær mundi vera að vænta rafmagns í Dalasýslu.