28.03.1958
Neðri deild: 75. fundur, 77. löggjafarþing.
Sjá dálk 281 í C-deild Alþingistíðinda. (2124)
158. mál, búnaðarmálasjóður
Frsm. (Jón Sigurðsson) :
Herra forseti. Ég hef nú því miður ekki við höndina allar þær tölur, sem 1. þm. Rang. spurðist fyrir um, og þó að ég muni svona nokkuð, þá er alltaf vissast að fara rétt með, og læt ég þess vegna hjá líða að svara nokkru af því, sem hann spurði um. En viðvíkjandi þeim tekjum, sem hann taldi að búnaðarmálasjóður hefði, get ég upplýst það, að þær eru núna, að mig minnir, 1 millj, og 700 þús. kr., voru núna síðast, þegar var gert upp. Og alltaf má deila um, hvað mikið þær vaxa núna næstu árin. En það verður væntanlega alltaf eitthvað meira, en hvort það verður á næsta ári komið upp í 2 millj. kr., það er annað mál, og það fer líka vitanlega eftir ýmsu öðru, m. a. framleiðsluárferði o. fl.
Þá dró þm. það nokkuð í efa, að bændastéttin væri samþykk þessu. Það er náttúrlega engum vafa bundið, og það er svo um öll mál og ekki sízt um svona stórmál, þar sem á að taka gjald af mönnum, að þá eru alltaf einhverjir menn, sem skerast úr leik og vilja ekki vera með og finna sér eitthvað til. Það er ávallt svo í hverju einasta máli, en búnaðarþingið, sem samanstendur nú af fulltrúum fyrir bændur um allt land, er komið það langt, að þeir eru svo að kalla orðnir sammála um þetta. Það sýnist mér bera vott um, að þessi ráðstöfun muni ekki vera að ástæðulausu. A. m. k. er svo mikið víst, að búnaðarþingsmönnum er ljós þörfin og náttúrlega ljósari en mörgum öðrum, og ég fullyrði það og enda raunar dró nú ekki hv. 1. þm. Rang. það í efa, að eins og nú er háttað húsakosti Búnaðarfélags Íslands, er það til stórtjóns fyrir félagið og alla starfsemi þess, sem bændastéttin þá einnig líður fyrir.
Þegar menn ræða um það, hvað mikil álög þetta eru, þá ætla ég, að þetta sé ekki nema svona hátt á annað hundrað krónur á meðalbónda, og miða ég þar víð framleiðslu bús, sem gert er ráð fyrir hjá framleiðsluráði, og svo mikið er víst, að það er aldrei nema partur úr lambsverði á árí, og það get ég ómögulega talið að sé ægilegt, þ. e. a. s. þegar tekið er meðaltal.
Það er ekki hægt að segja, að þetta sé neinn ægilegur skattur til þess að koma upp framtíðarheimili fyrir búnaðarfélagsskapinn í landinu, sem hefði þá sína miðstöð þarna, eins og hugsað er, og ég efast um, að í þessu fellst í raun og veru nokkuð meiri stórhugur, en þegar Búnaðarfélag Íslands með svo að segja tvær hendur tómar byggði sitt búnaðarfélagshús í kringum aldamótin. Þetta til þess að gera stóra og myndarlega hús var á þeim tíma geysilegt átak, sem við höfum búið að fram á þennan dag og búum að enn, og ég er ekki sannfærður um, að þetta sé, miðað við tíma og allar aðstæður, afskaplega miklu meira átak.
Svo læt ég útrætt um þetta að sinni.