14.04.1964
Neðri deild: 78. fundur, 84. löggjafarþing.
Sjá dálk 850 í C-deild Alþingistíðinda. (2156)
202. mál, vinnuvernd
Guðlaugur Gíslason:
Herra forseti. Það er án efa rétt hjá hv. flm. þessa frv., að ýmis ákvæði þess væri eðlilegt að festa í íslenzkri löggjöf. Önnur geta orkað tvímælis, eins og hann réttilega bendir á í grg. með frv. En þegar þessi mál eru til umr. hér á hv. Alþingi, er ekki óeðlilegt, að sú spurning vakni, hvort ekki sé tímabært, að vinnulöggjöfin, eins og hún er nú í dag, verði einnig og jafnhliða tekin til almennrar endurskoðunar. Vinnulöggjöf sú, sem við búum við, mun vera frá árinu 1938 og er því orðin 25 ára gömul, og hafa ekki á henni verið gerðar neinar breytingar, sem heitíð getur.
Flm. tekur það fram í grg. með frv. þessu, að hann telji eðlilegt, að höfð verði allnáin hliðsjón af almennri vinnuverndarlöggjöf nágrannalanda okkar. Nú vildi ég beina þeirri spurningu til hans, hvort hann telji ekki eðlilegt einnig, að vinnulöggjöfin verði jafnhliða þessu máti tekin til endurskoðunar og þar einnig höfð til hliðsjónar vinnulöggjöf nágrannalanda okkar, sem helzt væru þá Noregur eða Danmörk. Hann gerði hér áðan að sínum orðum orð hv. formanns samgmn. í gær, hv. 2. þm. Vesturl., þegar hann sagði, að það væri rétt fyrir okkur að gefa gaum því, sem lögfest væri hjá okkar nágrannaþjóðum. Ég tel, að þessi orð hv. flm. þessa frv. gefi tilefni til að æt1a, að hann muni geta talið það eðlilegt um vinnulöggjöfina, sem eins og ég benti á áðan er orðin rúmlega 25 ára gömul og án efa mjög komin úr samræmi við það, sem er gildandi í sambandi við vinnulöggjöf okkar nágrannaþjóða.
Ég vildi sem sagt leyfa mér að beina þeirri spurningu til hv. flm. þessa frv., hvort hann telji ekki eðlilegt, að vinnulöggjöfin eða lögin um stéttarfélög og vinnudeilur séu einnig og jafnhliða þessu frv. tekin til gagngerðrar og almennrar endurskoðunar.