12.04.1965
Efri deild: 68. fundur, 85. löggjafarþing.
Sjá dálk 1537 í B-deild Alþingistíðinda. (1243)

57. mál, eftirlit með útlendingum

Frsm. (Ólafur Jóhannesson):

Herra forseti. Eins og hæstv. dómsmrh. gerði grein fyrir í framsöguræðu sinni um þetta mál, er þetta frv. samið af n., sem í áttu sæti lögreglustjórinn í Reykjavík, Sigurjón Sigurðsson, deildarstjóri í dómsmrn., Elías Elíasson, og fulltrúi við útlendingaeftirlitið, Jón Sigurpálsson.

Aðalbreytingin, sem felst í þessu frv., sem hér liggur fyrir, frá núgildandi l. um útlendingaeftirlit, er sú, að lagaákvæðin eru færð til samræmis við samning á milli Norðurlandanna um vegabréfaeftirlit við landamæri Norðurlanda, en sá samningur á milli Norðurlandanna er frá árinu 1957 og er prentaður með þessu frv. sem fskj. Það er í 14. gr. þess samnings gert ráð fyrir því, að Ísland geti gerzt aðili að samningnum og var á fundi Norðurlandaráðs, sem haldinn var í Reykjavík árið 1960, samþ. ályktun þess efnis, að Ísland gerðist aðili að áðurnefndum samningi. Og með því lagafrv., sem hér liggur fyrir, eiga að vera sköpuð skilyrði fyrir því, að Ísland geti gerzt aðili að þessum Norðurlandasamningi og löggjöfin um eftirlit með útlendingum færð til samræmis við það. En það má segja, að aðalbreytingin liggi í því, að með þessum samningi eru Norðurlöndin gerð að einu samfelldu vegabréfasvæði og með þeirri lagabreytingu, sem hér er gerð till. um, mundi Ísland verða einn hluti af því svæði, þannig að útlendingar, þ.e.a.s. menn frá öðrum löndum, en Norðurlöndunum, eru þá aðeins háðir vegabréfaskyldu eða eftirlitsskyldu við útmörk þess svæðis, þegar þeir koma til einhvers Norðurlandanna í fyrsta skipti, en eru svo ekki háðir vegabréfaskyldu á milli Norðurlandanna.

Í þessu frv, eru svo aðrar og veigaminni breytingar og lagfæringar frá þeirri núgildandi löggjöf um eftirlit með útlendingum, sem er frá árinu 1936, en það eru yfirleitt ekki mikilvægar breytingar, sem er þar um að tefla og ég sé ekki ástæðu til að fjölyrða um þær. En eins og nál. á þskj. 439 ber með sér, hefur allshn. fjallað um þetta frv., haft það nokkuð lengi til athugunar og hún mælir með því, að það sé samþ., en einn nm., hv. 9. þm. Reykv., tók þó ekki afstöðu til frv. — Ég sé svo ekki ástæðu til að hafa þessi orð fleiri.