24.03.1966
Neðri deild: 59. fundur, 86. löggjafarþing.
Sjá dálk 748 í B-deild Alþingistíðinda. (572)
148. mál, Iðnlánasjóður
Þórarinn Þórarinsson:
Herra forseti. Tveir þm., ég og hv. 3. þm. Norðurl. e., sem eigum sæti f iðnn., höfum borið fram á þskj. 343 þrjár brtt. við það frv., sem hér liggur fyrir. Þessar brtt. eru í samræmi við frv. um breytingar á iðnlánasjóðslögunum, sem 5 þm. Framsfl. lögðu fram fyrr á þinginu. Ég sé þess vegna ekki ástæðu til að ræða ýtarlega efni þeirra hér, því að það var gert við framsögu málsins, þegar það frv. var til 1. umr. hér í d., en aðeins rifja það upp, í hverju þessar till. eru fólgnar.
1. brtt. er sú, að í stað þess að í frv., sem fyrir liggur, er lagt til að hækka framlag ríkisins úr 2 millj. í 10 millj. kr. árlega, þá er lagt til í brtt. okkar, að framlag ríkissjóðs verði árlega jafnhátt og tekjur þær, sem sjóðurinn fær af því gjaldi, er iðnaðurinn greiðir til hans árlega, en það er áætlað nú á þessu ári í kringum 17—18 millj. kr. Hér er því um allverulega hækkun að ræða frá því, sem gert er ráð fyrir í frv., sem fyrir liggur. En þó er það kannske ekki aðalatriðið í þessu máli, heldur það, að með brtt. er lagt til, að iðnlánasjóður njóti sömu aðstöðu og stofnlánasjóðir sjávarútvegs og landbúnaðar, þ.e. að ríkið leggi honum árlega til jafnhátt framlag og nemur gjaldi því, sem viðkomandi atvinnugrein greiðir í viðkomandi stofnlánasjóð.
Ég held, að ef svo fer, sem ég trúi ekki að óreyndu, að þessi till. nái nú ekki fram að ganga, hljóti hún að gera það fyrr en seinna, vegna þess að hér er um sjálfsagt réttilætismál að ræða. Iðnaðurinn er fullkomlega þess verður, að hann njóti í þessum efnum sem öðrum sömu aðstöðu og aðrir atvinnuvegir. Hann er svo þýðingarmikill og á þó vafalaust eftir að verða enn þýðingarmeiri á komandi árum, að hann verðskuldar fullkomlega að vera settur jafnhátt og sjávarútvegur og landbúnaður.
2. breyt., sem við leggjum til að gerð verði á frv., er sú, að hin almenna lánsheimild, sem felst til handa sjóðnum í frv., verði hækkuð úr 150 millj. kr. í 200 millj. kr. Við álitum, að þörfin fyrir eflingu iðnlánasjóðs sé svo mikil, að það veiti ekki af því að hækka lánsheimildina í þetta mark.
3. brtt., sem við berum fram, felst í því að lengja lánstíma þeirra lána, sem sjóðurinn veitir. Lánstíminn í lögunum nú er 15 ár hvað snertir fasteignir, en 7 ár hvað snertir vélar. Við leggjum til, að lánstíminn verði lengdur upp í 20 ár hvað snertir fasteignir og 10 ár hvað snertir vélar, og þetta er gert til samræmis við þau ákvæði, sem um þetta eru í fiskveiðasjóðslögunum og í lögunum um stofnlánadeild landbúnaðarins. Við teljum, að iðnaðurinn hafi ekki síður þörf fyrir það en landbúnaður og sjávarútvegur að fá lán til þess tíma og þess vegna sé eðlilegt, að þessi breyting verði gerð á lögunum um iðnlánasjóð að þessu sinni.
Ég sé svo ekki ástæðu til þess að fjölyrða meira um þetta mál, en vil vænta þess, að þessum till. verði vel tekið.