22.03.1968
Neðri deild: 82. fundur, 88. löggjafarþing.
Sjá dálk 901 í B-deild Alþingistíðinda. (809)
158. mál, ráðstafanir til lækkunar ríkisútgjalda
Fjmrh. (Magnús Jónsson):
Herra forseti. Hv. 4. þm. Reykv. bar hér fram tvær fsp., aðra í sambandi við 7. gr. frv. um breytt skipulag fræðslumálaskrifstofunnar og hina varðandi stjórnarráðshús og byggingu þess. Viðvíkjandi stjórnarráðshúsinu spurðist hann fyrir um það, hvort niðurfelling þessarar fjárveitingar hefði einhver áhrif í þá átt að fresta framkvæmdum í því máli. Ég tel ekki, að þetta hafi nein áhrif í þá átt, nema því aðeins að haldið verði áfram að fresta þessum greiðslum. Það er búið að safna nokkru fé í Byggingarsjóð stjórnarráðshúss, og eins og hv. þm. sagði, er það bygging, sem kostar geysimikið fé og er mjög ólíklegt, að verði hægt að fjármagna með fjárlagaframlögum jafnóðum og því verki miðar áfram, heldur verði að taka veruleg lán til byggingarinnar, þegar þar að kemur, eða sjá með einhverjum hætti fyrir sérstökum tekjustofni til hennar. Það hefur enn ekki verið tekin nein ákvörðun um það, hvenær eigi að hefjast handa um byggingu þessa húss. Hv. þm. minnti á það, sem hæstv. forsrh. sagði um það mál hér í þinginu fyrir skömmu, og ég hef engu við það að bæta. Það kom mjög skýrt fram hjá hæstv. forsrh., hvað hefur verið unnið að undirbúningi málsins og að till. liggja nú fyrir um hús þetta, án þess þó að ríkisstj. hafi tekið endanlega ákvörðun um það, hvort hún fallist nákvæmlega á þá skipun mála eða þær teikningar, sem fyrir liggja, eða hvort óskað verður einhverra breytinga. Ákvörðun hefur ekki verið endanlega um það tekin. Hins vegar hefur ekki verið gerð enn þá nein áætlun um það, með hvaða hraða skuli unnið að byggingu hússins, ef til kemur, en ég tel, að það þurfi að gera um það nákvæma áætlun, þegar þar að kemur, hvernig eigi að ráða við það fjárhagslega. Ég tel sem sé, að það sé óhætt að fullyrða, að það geti ekki haft nein úrslitaáhrif á það, hvaða tímasetning verður á byggingu stjórnarráðshúss, þó að þetta framlag sé fellt niður nú, og ég er hv: þm. sammála um nauðsyn þess að reisa það hús, þó að það geti alltaf verið álitamál, hvaða sparnað það hefur í för með sér. Það skal ég engu spá um á þessu stigi.
Varðandi 7. gr. þessa frv., sem mikið hefur verið gerð að umtalsefni, hef ég áður sagt, að ástæðan til þess, að þessi ákvæði eru tekin upp í þetta frv., er sú, að talið var nauðsynlegt að fá ákveðna stefnumörkun hjá Alþ. í málinu, þannig að hægt væri að hefja nú undirbúning að þessari skipulagsbreytingu embættanna, fræðslumálastjóraembættisins og þeirra embætta annarra, sem hingað til hafa verið tengd fræðslumálaskrifstofunni. Vegna þessa hefði verið nauðsynlegt að fá stefnuákvörðun um þetta í þessu frv., þar sem það tekur sinn tíma að undirbúa málið, og raunar skiptir það verulegu máli varðandi það, hvort á að hefjast handa um undirbúning þeirra skipulagsbreytinga, sem af því leiða, að þessi stefnuákvörðun fengist. Vitanlega geta það verið margvísleg álitamál, sem koma upp í sambandi við það, hvernig eigi svo að skipa þessum málum í framtíðinni. Það er alveg rétt, sem hv. þm. hafa bent á, að fræðslumálastjórnin lætur mörg svið skólamála til sín taka; vitanlega þarf að endurskoða og athuga þau lög og með hvaða hætti þessum málum verður fyrir komið í þessu nýja skipulagi. Hins vegar er ekki í þessu frv. beinlínis gerð nein till. um að breyta hlutverki fræðslumálastjóraembættisins sem slíks. Það er aðeins gert að deild í rn. í stað þess, að það er nú embætti, sem vitanlega heyrir undir rn. eins og öll slík embætti, þannig að á því á ekki að þurfa að verða veruleg skipulagsbreyting. Ég get í rauninni ekki svarað spurningunni á annan veg en þann, að mér er ekki kunnugt um, að á þessu stigi málsins sé það ætlun hæstv. menntmrh. að breyta í einu né neinu því starfi, sem fræðslumálastjóri hefur unnið. Hvort það verður gert, þegar rækilegar verður unnið úr þessu í lögum, sem um það verða sett og verður hafizt handa um að undirbúa nú, það kemur á daginn á sínum tíma og verður hv. þm. þá ljóst. En eins og ég segi, ég tel ekki, að það sé ætlunin nú að breyta þessu hlutverki fræðslumálastjóra, t.d. í sambandi við umsagnir hans um kennara fyrir næsta haust. Ég býst við, að málið komi að öðru leyti til meðferðar hér á Alþ. á næsta vetri, því að hér er gert ráð fyrir breytingum á mörgum lögum — eins og hv. þm. segja — sem auðvitað þarf að taka fyrir hér með eðlilegum hætti, þegar þar að kemur, og verði það ætlunin í framtíðinni að gera einhverja skipulagsbreytingu varðandi stöðu fræðslumálastjórans sem slíks, mun það koma fram í þeim lögum. En ég tel ekki, að það sé ætlunin að breyta því með þessum lögum.