08.05.1969
Efri deild: 88. fundur, 89. löggjafarþing.
Sjá dálk 253 í C-deild Alþingistíðinda. (2499)
166. mál, menntaskólar
Jón Árm. Héðinsson:
Herra forseti. Ég ætla ekki að eyða miklum tíma um þetta frv., en ég sé það, að í 1. gr. eru taldir upp ákveðnir staðir í frv. Ég get ekki varizt því að sakna þess, að Reykjanesumdæmið er ekki talið með. Það er þó hverfi, sem hefur brátt talsvert yfir 30 þús. manns, og sannarlega væri ekki úr vegi að athuga það gaumgæfilega, að þörfin á næsta menntaskóla þar er mest. Hafnarfjörður er áreiðanlega kjörinn staður fyrir næsta menntaskóla, sem rís hér á Íslandi. Hann er miðsvæðis, og góðar vegasamgöngur eru frá Keflavík til Hafnarfjarðar, einnig frá Garðahverfi í Hafnarfjörð, og það virðist ekkert óeðlilegt, fyrst verið er að telja upp staði á Íslandi, að þessi staður fljóti með, það er mín skoðun. Að vísu stendur í frv.: „Menntaskólar skulu vera svo margir sem þörf er á, þ. á m. tveir í Reykjavík“ o. s. frv. En þó er talið upp: „einn á Ísafirði og einn á Austurlandi.“ Það hafa komið raddir frá þessum stöðum, og ég hef ekkert á móti því. En það er ekki nóg að samþykkja, að skóli skuli vera á staðnum, það þarf kennaralið, og það þarf margt fleira. Ég tel, að Hafnarfjörður hafi mikla yfirburði yfir þessa staði, að þeim gjörsamlega ólöstuðum. Nemendafjöldi er fyrir hendi, og mér segir svo hugur um, að það sé ekki langt í kennaralið líka frá Hafnarfjarðar-staðsetningu. Ég vænti þess, að þó að Hafnarfjörður yrði valinn í Reykjanesumdæminu, þá yrði ekki togstreita af hálfu Kópavogs eða Garðahrepps, vegna þess að svæðið liggur vel við. Ég vildi vekja athygli á þessu. Það er ekki minni ástæða til að tala um það svæði en eitthvað annað.
Það vakti líka athygli mína, að það hefur komið frv. fram, var lagt á borðið hjá okkur í dag, um Kvennaskólann í Rvík, að hann fái að njóta réttinda til að brautskrá stúdenta. Í 3. gr. þess frv. segir: „Kostnaður við menntadeild kvennaskólans greiðist úr ríkissjóði.“ Þarna á að lauma inn einum í viðbót, og þá fer ég nú að vera enn harðari á því, að Reykjanesið sitji að sínu ekki síður því að grundvallarskoðun í frv., sem á lof skilið, er, að skólarnir skuli vera fyrir pilta og stúlkur, samkv. 4. gr. Það getur verið mál út af fyrir sig að fara að stofna sérskóla fyrir sitt hvort kynið, en það er ný stefna á Íslandi í framhaldsmenntun.
Að öðru leyti mætti fjalla um þetta frv. varðandi námssvið og annað, og það væri ekki úr vegi að beina þeim menntaskóla, sem kæmi vonandi sem fyrst í Hafnarfjörð, nær þjóðlífinu sjálfu. Það vantar sannarlega, að menntaskólarnir séu nær raunveruleikanum, eins og íslenzkt efnahagslíf er í dag. Ein mesta fiskvinnsla fer fram á þessu svæði og talsverður iðnaður og á eftir að vaxa verulega, og það væri því ekki úr vegi, að þarna væri sérstakur raunvísindamenntaskóli, sem legði sérstaka áherzlu á slík fræði. Það er sannarlega í tengslum við það, sem er að koma á Íslandi og hefur verið á þessu svæði.
Ég vildi aðeins vekja athygli á þessu. Ég veit ekki, hvort menntmn. vill breyta einhverju hér um eða hvort ríkisstj. telur, að þetta svæði, Reykjanesumdæmið, eigi völ á sínum skóla. Ég gat ekki látið hjá líða að minna á þetta, að þarna er svæði, sem á fullkomlega sanngjarna kröfu til, að eftir því sé munað, ekki síður en önnur svæði.